Zunjig 19 april 2920, Ortedoks Paose.

19 apr 2020, 7:13 • nieuws

Wikipedia

De (Oosters-) Ortedokse kirke, ouch waal Byzantijnse Kirke geneump, viere vandaag Paose. Dit waerd ongerangere gevierd in Abchazië, Bosnië en Herzogowina, Bulgarije, Griekelandj, Kosovo, Moldavië, Noord-Masedonie, Oekraïne, Roemenië, Ruslandj, Servië, Syprus, Wit-Ruslandj en Zjorgië. Verder waerd 't ouch gevierd in de oriëntaals-ortedokse kirke: Kopties, Syries, Etiopies en Iritrees.

Worom väölt Ortedoks Paose op eine angere datum?

Det is ein ingewikkeld verhaol waat ich prebeer hie get dudelik te make.

In de eerste tied van 't Kristedom vierde men Paose tegeliek mit 't Joedse Pesach, de 14de van de maondj Nissan. In de eeuwe daonao vierde bienao elke plaatselikke kirk dit fees op eine angere datum. Sommige kirke keke daobie nao 't Joedse Pesach angere sjtelde 't op 27 maart es vaste datum en angere hadde angere variasies. 't Konsilie van Nicaea wilde dao in 't jaor 325 verangering in bringe mer det leep eigelik op nieks oet.

't Konsilie (Ein algemein vergadering van de ganse kirk) in Konstantinopel, later Byzansium en noe Iestanboel geheite, maakde dao ein inj aan.

Men ging d'r van oet det Paose altied nao 't Joedse Pesach mos valle omdet 't opsjtaon van Kristus oet 't graaf ouch nao dit fees waas gewaes en 't mos op eine zunjig zeen. 't Fees mos gaon valle op de eerste zunjig nao de eerste vol maon in de lente. Omdet 't Joedse Pesach ouch volgens zo'n metode beraekend waerd zol det meistal voldoende motte zeen om 't Kristelikke Paose na 't Joedse te laote valle. Veur de jaore det dit neet zo waas waerde veur de zekerheid nog d'r bie gezach: Nao 't Joedse Paose.

Veur 't gemaak sjlaon ich ein ingewikkeld sjtök gesjiedenis euver. In de middeleeuwe ontdekde men det de in 't jaor 42 veur Kristus door Julius Caesar ingeveurde kelender, de juliaanse kelender, neet meer ech sjpaorde mit de astronomise wirkelikheid. In 't jaor 1582 veurde Paus Gregorius XIII de gregoriaanse kelender in es ein korreksie op de juliaanse. Men leet geweunweg teen daag weg en regelde de sjrikkeljaore ein bietje angers. De lente begos zo weer rondj 21 maart.

In väöl ortedokse kirke bleef men nog raekene mit d'n aje juliaanse kelender, vandao 't versjil. Zo kump 't ouch det me dao Kersmis op 7 jannewarie viert.

De foto leet os de Ikonestase en de absis van de Servies-ortedokse kirk van de Gebaorte van de Maag Maria in Zvornik (Serviese Repebliek in Bosnië en Herzogovina) zeen.