Crisis de eine veurt der wel biej en de angere ligk ut leudje. Óm ós haer waert der geklaag det de crisis veur dood en verderf zorg en det is ouch zo. De waereld is hél getroffe door Corona.
De bewaegingsvriejheid is toet ein deeptepunt gezak. Virologe beheerse euver dien doon en laote. Politici make misbroek en gebroek van de situatie. De angerhalve maeter is in eine keer de meis besjpraoke maot. Ein handj gaeve of ómhelzing is zo gét sjtraofbaar gewaore.
Seniore verpietere weg in verpleeghoeze. Einzaamheid is groter dan ooit. Sjlum luuj make gebroek van deze tied en sjpringe in de gate in de mért en angere zeen geketend aan hoes en zeen häör opgeboewd bedrief nao de verdommenis gaon.
Mark Rutte wurp zich op as de redder van de nasie en sjpint dao gare biej. Ein op de véér Nederlanders zou op dit moment VVD sjtumme en de rés löp dao zielig achteraan. Van ut roemruchte CDA heurs ze nieks en diej valle dan ouch zjwaor terök in de peilinge.
In Remunj is ut neet anges dao meint ut college as redders van de sjtad op te kómme maar noew éch daadkrach waert gevraog kump häör zjwaakte nog meer baove drieve. Door häör vlaggedragers wete ze zich nog gét gesjteund maar de burger
haet ut sjteeds meer gehad mit ut beleid in de biessjopsjtad. Ouch hiej haet ut CDA hil väöl krediet versjpeeld. Neet op de létse plaats door de eerste burger die ouch CDA-er is maar ouch door de jaore haer haet ut CDA häör handj euversjpeelt.
Nooit eerder had ut CDA zo weinig zetels in de Remunjse raod en as ze zo doorgaon waere der det in 2022 nog minder. Mit wanbeleid te sjteune haol ze gein sympathie. De euverige coalisiepartners verbleike auch sjteeds meer.
Greun Links kint gein voes make en kiek te zeer nao angere, D66 rent achter de rés aan, net wiej in Den Haag en van ‘veer zeen Zjwame’ hoof ze en moogs ze ouch nieks verwachte. Donderdaag is der de eerste digitale raodsvergadering in de geschiedenis van Remunj.
Dees vergadering is gans dichgetummert en euver prebleme biej de kleine zelfstandige en vereniginge moog van de coalisie neet gesjpraoke waere. Ondanks det tal van gemeintes beleid veure óm deze doelgroep de helpende handj toe te sjtaeke is ut CDA same mit Greun Links, DS en D66 mordicus taege ein debat euver hulp te beeje.
Dao euver sjpraeke waert neet ins meugelik gemaak. Ich zou zégke kiek donderdaag 7 mei maar nao de raodsvergadering en geer zult zeen en heure det zake diej hadde kinne wachte veurrang kriege baove de hoge nood te bedwinge die de burgers noew ut meiste rake en bezig hilt.
Toet vaegs, uche Sjtraotvaeger
Dré.
