Zeve jaor naodet Sjinderhannes zien zeel aan de duvel haet verkoch om Florenske te kriege kump de duvel zien deil van ’t kontrak opeise en kump Sjinderhannes haole. Sjinderhannes sjtelt veur eers nog get te drinke om mood te kriege. Det waerd bezonge in ’t sjitterende duet van Beëlzebub en Sjinderhannes:
Kom, stoten wij lustig tezamen eens aan,
wij hebben nog tijd om ter helle te gaan;
wij hebben nog tijd om ter helle te gaan!
De duvel waerd zaat gevoord en opgesjlaote. Dan eist Sjinderhannes de sjriftelikke euvereinkoms terök en zingk:
Doe gufs det perkement terök,
waat ich höb ongersjreve,
of doe kins jaore aan ein sjtök,
dich in dees manj gereve!
Beëlzebub is geine kleine jong. In ’t Nuje Testament waerd hae de Vors van de demone geneump. De naam kump oet ’t Hebreews en is eine sjpotnaam oet de biebel. De eigelikke naam is Beëlzebul waat “heer van ’t hoes” beteikent. Beëlzebub dao taege beteikent “heer van de vlege”. Veer höbbe dus mit eine sjersduvel van doon dae Hollands meint te motte kalle en zich zaat leet vore. Es d’r zaat is kint d’r opins plat:
Ich höb ‘ne sjtert mit ‘ne kwas,
ich höb ‘ne sjtert dae ich kan bewaege.
lch höb ‘ne sjtert mit ‘ne kwas,
ich höb ‘ne sjtert wo ich mit kan vaege.
lch höb ‘ne sjtert mit ‘ne kwas,
ich höb ’ne sjtert, dae zit mich vas!
’t Bronze beeldje van Beëlzebub sjteit op de hook van de Sjoemaekersjtraot en de Munsterssjtraot. ’t Is gemaak door ’t kunstenaersduo Wienand Thönissen en Dick van Wijk die dökker höbbe samegewirk. ’t Waerde onthuld op 13 september 1984 en waas gesjonke door de Sjtichting Vitrienes Hertje Sjtad. Dudelik is te zeen det de duvel ’t perkement in zien handj hilt.
Foto en teks: Guus Rüsing.
