Sjtraotvaeger 2020/18: Handjhave of wegkieke?

Foto: Paul Brennan via Pixabay

In eine tied woh de regelgaeving van plaats toet plaats versjilt höbbe de handjhavers ut neet mékkelik. In Remunj klaagde de middesjtandj sjtein en bein euver de handjhavers die langskwame en vroge óm de reklame(obsjtakels) te verwijdere. Via de noodverordening had Remunj hiej ein verbod veur opgelag gedurende bepaalde daag. De boodsjap was neet biej ederein good gecommuniceerd waat weer zorgde veur ergernis.

De eine handjhaver is de angere neet, det waat weer zorgde veur miscommunicatie. De middesjténjer dae bliej is det der eine euro in de geldjlaai krieg wilt zien waar aanprieze, en waert dan gesommeerd zien reklamebord op te ruume. De vlam sjleit dan in de pan en dao zeen der zat diej dan dao nog gét aolie op ut vuur gooie. Alle begrip veur dae óngernaemer dae neet meer begriep whoróm det hae gedwarsboumd waert in zien zake doon.

Maar de handjhaver kin ze det neet kwaolik naeme want dae duit det waat um opgedrage waert. De regelnichte diej van alles en nog gét bedinke mótte ze aansjpraeke. Waat mót det mót maar euverdrieve is uch ein kuns. Waat in Remunj neet moog det moog in Mesjtreech waal en waat in Utrecht moog det kin in Remunj weer neet. Eine muzikant waert verbaliseerd as der meziek maak in ut openbaar en allerhande gezelsjappe make boete häör oefenaccomodatie toet laat in de aovend volop sjpiktakel. Wohróm neet geweun binne oefene? Of maak ut boete same zeen zo ein groot versjil.

As ich nao kusplaatse, grote winkelcentra’s en anger trekpleisters kiek loupe ze in rieje biejein en biej de rés wille veer handjhave. Ut brink sjteeds meer tweespalt in de samelaeving. In Remunj kin ich zónger móndjképke op loupe en in Elmpt moog ich nörges nao binne zónger képke. Of det Corona zich gét van ein grens aantrek. Veur hil väöl luuj is de grens bereik en veur hil väöl luuj moog ut nog wat sjtrakker. Ich bin van meining det veer van dees situatie mótte lere. Besjtudeer ins waat veer allemaol höbbe gedaon, doon of nog gaon doon en maak dan balans op.

Dae eine dierbare verlaore is dae zal anges dinke as eine woh ut neet toegesjlage haet. Komplottheorieje zat en dao doon ich neet aan mit. Dao is ein virus en dao höbbe veer mit aaf te raekene. Achteraaf kinne veer aafraekene mit zake diej veer neet good höbbe ingesjat. Ich zeuk de sores neet op en haai mich in deze op de achtergróndj want ich sjpraek elke daag virologe, wetesjappers, kruujedokters en politici diej alles al baeter wete.

Ich vaeg mien eige sjtraot en dan höb ich werk zat. In mien sjtraot ligk dees waek ein dossier euver óngersjteuning van degene diej ut hil hél neudig höbbe. Miljoene waere der oetgegaeve aan gedupeerde. Wedde det der weer zat naeve de pót piese en dao wil ich spesiaal op lette.

 

Toet vaegs,

Dré

Uche Sjtraotvaeger