In ’t eerste hoofsjtök van ’t book “De Munsterabdie van Remunj. Eine ontdekkingstoch door achhongerd jaor gesjiedenis van ein vrouwluujklooster” geit Erik Caris in op de sjtichting van de abdie. Interessant is dan om det te vergelieke mit hoofsjtök 18 van Peter Nissen: “Allene met minnen. De sjpiritualiteit van sistersiejenserinne in de derteende eeuw”. Ich weit det ’t krangsom is mer ich zol wille aanraoje eers ’t hoofsjtök van vrundj Peter Nissen te laeze en dan pas ’t hoofsjtök van vrundj Erik Caris.
Worom dit advies? Peter Nissen geit in breijere zin in op de beteikenis van ’t ontstaon van de vrouwelikke tak van de orde van Citeaux in de twelfde eeuw, de sistersiejenserinne. Hae guf de bleuj van de sjpiritualiteit van die orde aan in de derteende eeuw aan. Dees sjpiritualiteit mot bie ’t sjtichte van de Munsterabdie bekind zeen gewaes. Dees orde had in dae tied ein groot prestiege en daomit ein vitaal en aantrikkelik oetsjtraolingsnivo. Es leek zol ich zekke: Dees orde waas in de mode. Omdet veer euver de begin periode van de Munsterabdie in Remunj zogeit es gein sjriftelikke bronne höbbe nump Peter os mit nao de oorsjrong van de orde in Citeaux mit de sjtichter van ’t klooster; Robert van Molesme. Oet vergeliekinge mit anger kloosters en sitewasies prebeert hae os dunder bie ’t Remunjse gebeure te bringe en waat dao gesjpeeld kint höbbe. Veer kriege dus meer inzich in de konteks van de sjtichting en waat de sjtichters, Sjra en Greet, mer veural Richardis van Beijere, es eerste abdis, zich gedach kinne höbbe.
In det leech bezeen is de zin van Erik in ’t eerste hoofsjtök dan ouch teikenend: “In ein zichzelf respekterend graafsjap waas d’r ein sistersiejenserklooster”. Gelre had det nog neet. De moder van de sjtichter van ’t klooster, Graaf Gerard, wol es witvrouw, intraeje in zo’n klooster. Wie gezach: Det waas in de mode, dus kwaam d’r in Remunj ein nuuj klooster veur mam. Netuurlik ware d’r veur ’t zeunke Sjra ouch alderlei anger raeje om juus veur Remunj te keze. Hae zal de kepotmaekerie van zien “Villa optima” kort daoveur, door Keizer Otto IV, in 1213, noch neet vergaete zeen.
Nog väöl kinne veer lere. Dit book haet dan ouch neet de pretensie ’t letste waord te höbbe. Väöl meer haope de sjrievers mit häör biedrages eine aanzet gegaeve te höbbe veur wiejer ongerzeuk”.
uus Rüsing
Dit book is oetgegaeve, in samewirking mit de Sjtichting Rura Remunj, door WBooks in Zjwolle. ISBN 978 94 625 8379 5, pries 34,95 Euro. Verkriegbaar bie de Remunjse bokewinkels.
