Op de Aje Boelvaar likke dees twee sjoon herehoezer naeve ein. ’t Linkse (1894) is van arsjetek Jean (Janne) Speetjens en ’t rechse van Nijskens. Behalve de euverbekinde Pierre en Jos Cuypers had Remunj op ’t inj van de negenteende en begin van de twinjtigste eeuw heel get meer arsjetekte die, eder op zien meneer, häör sjtempel op de sjtad drökde. Get anger name zeen: Rouleau, Jorna, Pollaert, Rammers en Langenhoff veur de Boelvaars. Verder Bertrams, Corbey, Delsing, Berbers en van der Schuit veur de Kepelderwaeg. Vergaete veer vooral ouch neet, zeker veur de binnestad, oze Frens Dupont. Wanneer krieg dae noe ins ziene verdeende sjtraotnaam?
In de jaore sestig van de negenteende eeuw begos men mit sjtadsoetbreijing. Det waas hoogneudig want de meiste miense woonde binne de moere van de sjtad en die begos euvervol de rake.
Efkes get siefers (mit dank aan Gerard Geuskes van ’t Sjtadsarsjief): In 1798 had Remunj 3.960 inwoners. In 1827 ware det d’r 4.874, wovan 212 in de buurtsjappe Roer, Kepel en de Weerd. In 1851 telle veer 7.175 en in 1863 8.808 miense. In 1880 zitte veer op 10.569 en in 1900 al op 12.358.
De sjtadsoetbreijng begos rondj 1860 wie de wal tösse de Neelderport en de Kepellerport waerde aafgegrave en de grach waerde dichgegooid. De sjtadsmoere ware al eerder, in de jaore dertig, aafgebraoke. Zo ontsting oet de Zjwartbrokerwal de (Aje) Boelvaar oftewaal de Willem II singel. In 1869 waerde de eerste 31 boepersele verkoch en de eerste hoezer geboewd. In 1881 ware de letste persele verkoch en begos men aan de Nuje Boelvaar, de Godsweerdersingel.
