Blog – Dees waek de jaorsjtökke van de gemeinte gelaeze. Dao waers ze neet bliej van. Ut is letterlik en figuurlik ‘kommer en kwel’. Remunj haet de sjpaarpot langzaam laeggevraete. Waas der in 2012 nog ein megareserve is der noew dankzij de huidige coalisie (en neet door Corona) de baom zichbaar. Ze gaon ut weer aanvulle is belaof. Waem dink geer waem dit mismanagement mót gaon betale? Juus de Remunjse burger. De sjatmeister van de sjtad haet ein gaat in de handj en let neet good op de winkel. De eine ambtenaer nao de angere verleut de gemeinte Remunj. Dure tiedelikke krachte naeme de plaatse euver.
De parkeergarage sjteit vol mit auto’s van ambtenaere diej waal häör bótterham in Remunj verdeene maar nieks mit de sjtad höbbe. Vraog die neet woh de Kemp of ut Veldj is. Zjwame en Maerem wete ze al gaar oet neet te vinje. De ‘veurbiejgéngers’ waere aangesjtuurd door ein kollege det ze auch al neet op sjtraot zuus. Veur de burgers dus onzichtbaar. Prebeer maar ins eine aafsjpraok mit häör te make. Mit ‘Brood en sjpele’ haaie ze ut volk koesj. Maar de bevolking kump sjteeds meer in opsjtandj. Ze pikke ut neet meer. Mit de noodwet achter handj hilt de euverheid de miense nog waal aeve sjtil maar auch die noodwet is zjwaor aan sjlietage toe.
As ze de luuj dalik auch nog ins aan de sjrabbers gaon dan brik de hel lós. Dan zulle de doeme diej noew nog incidenteel omhoog sjtaeke zeker omleeg waere gesjtaoke👎🏻. Ut volk mort en is de noodwet meer dan zat. De handjhavers gebroeke beveurbeeld de wet om mit de neudige willekeur luuj in de hook te zitte. De eine breef nao de angere waert nao de gemeinteraod gesjtuurd. De breve nao ut kollege waere door ut kollege neet effectief beanjwaord. De gedwonge louprichting, aafgemaete aafsjtandj, maximaal aantal luuj biejein höbbe häöre houdbaarheidsdatum euversjreje. Ut gemor is in inkele gemeintes al te heure en Remunj zal neet achter blieve. Mit honing óm de móndj sjmere en loze beloftes is ut gedaon. De honingpot is laeg en ut belaofde landj raak sjteeds wiejer weg. Is de vraog of dit wanbeleid nog 20 maondj mót dure toet de volgende verkeezinge of det der eerder ein einde aan kump. Ich blief veur uch missjténj aankaarte.
Toet vaegs,
uche Sjtraotvaeger,
Dré
