Blog: Sjtraotvaeger peiling.

Foto: Dré Peters

Terwiel zich biej ut CDA de eine nao de angere liestrekker melj en nog neet zeker is of Mona, Hugo, Pieter, Martin of toch nog emes anges liestrekker waert löp de populariteit van ut CDA terök. Neet allein in Remunj ligk ut CDA ónger de loep maar auch in Den Haag.

Landelik zak ut CDA volges peilinge weg nao 1 op 12 sjtumme. Det zeen 4 zetels minder dan noew. De VVD geit nao 1 op 4 en wint 4á5 zetels. Auch de PVV zak iets en de FVD sjtoumt op nao 1 op 13 sjtumme en wint dan 9 zetels. Groen Links -2 en D66 mit -9 blieve zich in balans haaie mit ein mega verlees van de pertie van Klaver. Of Sigrid Kaag dit verlees kin taegehaaie is maar de vraog. Ein pertie die de oudere in de samelaeving de rök toe dreijt moog bés waal royaal op häör vingers getik waere. De PvdA is op euverwinningskoers en zou volges de létse peilinge 9 zetels winne en ut CDA en Greun Links achter zich laote. Waert nao de zomer allemaol nog sjpannender. Rutte zal zich gét mótte laote invalle want de coronamaotregele zeen al ver baove de houdbaarheidsdatum. De SP krabbelt gét op en CU blief beheurlik sjtabiel. Denk haet zichzelf in de voot gesjaote mit de interne sjtrijd en zal eers sjérve mótte plekke. Auch lokaal merk ze de behoefte aan eine angere koers. Greun Links haet ut mit eine politica die baovegemiddeld presteert in Remunj neet kinne make. De tweede Greun Links besjtuurder is te wollig in zien zienswijze en make gein sjtappe. Ut CDA blief zeuke nao ein éch gezich in de lokale politiek en kin in de coalisie gein versjil make.

Mitluipers DS en D66 kriege ut predicaat in goud as beste sjtumvee.

Kapitale blunders waere getolereerd, greuiende onveiligheid krieg gein aandach en de alsmaar groter waerende ergernis euver ein totaal vervoelde openbare ruimte waert neet opgepak. Drugseuverlas: greuiend gebroek van lachgas, alcohol en drugs op gelegaliseerde plekke is waal de grootse ergernis van de burgerie.

De reserves in Remunj rake in ein sjnel tempo op. De bookhaajers in ut sjtadhoes zeen waereldkampioen creatief bookhaaje. Ut ein gaat waert mit ut anger gevuld en dao zeen nog portefeuillehaaiers die nog volop bezig zeen gate de creëre en die mótte auch nog gevuld waere. Geer sjnap ut al, nao de verkeezinge 2022 moge angere de sores opknappe. De boosdoeners zeen zich van gein kwaod bewus en waere haopelik neet herkaoze. Ich bin somber as ut óm ós sjtad geit. In ut presidium gaon ze ut weer ins höbbe euver wiej ze angesdinkende de móndj kinne sjnoere. Maar de móndj sjnoere zal neet lökke. Missjténj blieve veur de échte volksvertegewoordigers verwerpelik.

Ich blief vaege veur ein zuuvere politiek,

Toet vaegs,

Uche Sjtraotvaeger,

Dré.