Zunjig 19 junie 2020. Jan Jorna (2) Nuje Boelvaar, pandj van Hooff.

Foto: Guus Rüsing

Jan Ales Jorna waerde op 20 julie 1854 gebaore in Wytgaard / Leeuwarderadeel es zoon van Abe Floris Jorna en Baukje Jans Houben. In desember 1888 kwaam hae, via Besel, nao Remunj wo hae in de leer ging bie Pierre Cuypers. Dao nao begos hae veur eige kop es arsjetek. Hae woonde eers in de Sjoemaekerssjtraot en dao nao op de Nuje Boelvaar. In 1921 ging hae truuk nao Frieslandj, wo hae op 21 september 1927 sjtorf in Idaarderadeel, ongetrouwd.

‘t Pandj van Ch.van Hooff is volges de sjtökker in ’t Gemeinte-arsjief door hem ontworpe in 1898 es woonhoes en magezien. De aannaemer waas eine Hornikx oet Remunj. Dae deej det veur ein bedraag van 13.464,- Duits geldj. (GAR, Collectie bouwtekeningen en bijlagen, inv. nr. 1726).
Interessant is ’t sjmeediezer van de ingangsport en veur de vinsters van de kelders. Verder zeen veer det naeve baksjtein ouch Naamse sjtein is verwirk. De sjtiel is röstig en me kint zeen det hae eine leerling van Pierre Cuypers is gewaes. De verhoogde port van ’t magezien aan de sjtraotkantj sjprink d ‘r waal oet mit de baovevinsters in baogvorm, de houtere versieringe en de aopeheid van de vinsters. Deent de Jugendstil zich hie al efkes aan?
Ouch ’t gestuuk waopensjildechtige embleem in tweede boelaog van de ziegevel is sjpeels te neume in vergeliek mit de res van ’t geboe. Of dit get later is aangebrach? D’r sjteit: “Firm. Wed. Th. v. Hooff Groothandel Galanterien enz”. Ein detaij is nog de ingemetselde sjtein naeve de deur van ’t woonhoes mit de teks: “Albert Marie Antoine Mathieu van Hooff, 1-8-1898”. Mit gebroek van de latere aanboe aan de achterkantj zeen d’r noe appartemente in gemaak.
Teks en foto’s: Guus Rüsing.