’t Paradies aope tiedes de zomermaonje

Foto: 't Paradies

Tiedes de opsjloeting höbbe väöl ajere in Remunj waeke of zelfs maonje binne gezaete. Noe ’t virus zjwaker is gewaore, is ’t veur seniore tied om weer onger de miense te komme. ’t Paradies is de ganse zomertied geäöpend. Ajer miense kinne hie in ein gooj ambians binne loupe veur ’n teske koffie in ’t Grand Café, wobie alle veiligheidsregels waere gevolg. G’r kint in alle rös de gezet of ’n book komme laeze, mer ouch geweun get kalle mit de aanwezige vriewilligers.
Tiedes de fekansietied gaon de meziekmiddige geweun door en kint g’r geweun biljare. G’r kint ouch mit ’n gruupke komme britsje, kaarte, ’n sjpelke doon of handjwirke. In ’t euverzich van aktiviteite kint g’r intressante kurzesse en laezinge vinje euver gesjiedenis, maatsjappelikke ontwikkelinge, kuns en kultuur, netuur en miljeu en godsdeens. Hiebie sjtaon ’t opdoon van kennis en ideje veur laeve en belaeve in de eige omgaeving veurop.