Veursjtellinge “De Gebreurs Peters Revue” en BCL-treffe 2020 versjuve nao 2021

Foto: Gebr.Peters

Nao lang wikke en waege höbbe ’t BCL-besjtuur, de Veldjmuus, de gebreurs Peters en theater De Oranjerie same besjlaote om “De Gebreurs Peters Revue” en ’t BCL-treffe dit jaor neet door te laote gaon. Door de coronamaotregele om aafstandj te haje, is ’t neet meugelik om de 800 bezeukers per aovend veur “De Gebreurs Peters Revue” en de verwachte 1750 miense tiedes ’t BCL-treffe veilig te ontvange. In good euverlik is besjlaote om de 3 geplande veursjtellinge van de Revue en ’t BCL-treffe ’n jaor oet te sjtelle.
Kaarte die veur “De Gebreurs Peters Revue” zeen gekoch, blieve geweun geljig veur dezelfde aovend kommend jaor.
De veursjtellinge zeen noe gepland op goonsdig 17, donderdig 18 en vriedig 19 november 2021. Dus es g’r noe kaarte höb veur de goonsdig, dan zeen die kommend jaor ouch veur de goonsdigaovend.
’t BCL-treffe zal kommend jaor waere gehaje op zaoterdig 20 en zonjig 21 november 2021.
Theater De Oranjerie zal binnekort via pos of mail kontak opnumme mit ederein dae ’n kaart haet gekoch.