Zaoterdig 19 september 2020. Nicolaas van der Schuit (2). Aje Boelvaar 80 en 82.

Foto: Guus Rüsing

De arsjetek Nicolaas van der Schuit (1854 – 1923) waerde op 6 juli 1854 gebaore in ’t Friese Oudega. (Kiek ’t sjtökske van giester). Toet ziene dood wirk hae bie Pierre Cuypers. Hae is veural bezig mit de boe van kirke en sjpeelt eine grote rol in de resterasie van kesjteel De Haar bie Haarzuilens. Hae guf aan de hoogste klasse van de Teikensjool les in boekunde, lienteikene en perspektief. Hae guf twellef lewsse per waek en volgens ’t “Verslag toestand Gemeente Roermond jaar 1883” verdeend hae dao 800 Gölde per jaor mit. In 1908, de aanvraog boevergunning is van 1 fibberwarie 1907, boewt hae twee hoezer op de Aje Boelvaar, de nommers 80 en 82. Hae geit mit zien femilie wone op nommer 80, op de foto ’t rechse hoes.

Van allebei de panjer kinne veer zegke det ze tradisionalisties zeen ontworpe. Ze lieke väöl opein mer versjille in details. Allebei höbbe ze twee boelaoge en eine toepgevel baove de veurdeur. Dae entree sjprink lich veuroet en waerd aafgedek door eine balkoen mit sjterk versjillend hekwerk en ouch heel versjillende konzaole. (Foto’s 2 en 3). Onger de daakranj is siermetselwerk te zeen, links (82) es tradisioneel moezetenj en rechs (82) ’t zelfde, ongerbraoke door konzäölkes. Ouch tusse de rame van de eerste en tweede boelaog is siermetselwerk te zeen. De baksjtein höbbe versjillende kleure. Allebei de hoezer höbbe ein zogenaamd mansardedaak.
Interessant is de konstruktie van de balkoene (foto 4) die röste op ein saort tongewelf. De dörpels zeen van Naamse sjtein, promp wie de plint aan de ongerkantj, die links (80)  rondj en rechs (82) heukig is aafgewirk.

 

 

 

Teks en foto’s: Guus Rüsing.