Vriedig 2 oktober 2020. ’t Leengoedt to Ruerbosch, kesjteelke Hattem,

Foto: Guus Rüsing

Veer kinne de gesjiedenis van ’t Leengoedt to Ruerbosch teruuk vinje toet in 1414. Op 7 junie 1414 teikende Reinald, Hertog van Gulik en Gelder, ein sjtök euver de oetgifte in erfpach van ’t good Ruerbosch, mit sjtökker landj d’r bie, aan Johan van Brede en zien erfgename. In ’t sjtadspark Hattem lik hie kesjteelke Hattem, men zaet waal ins det dit ’t kleinste kesjteel van Nederlandj is. Euvereges sjreef men vreuger “Hattum”. In ’t begin van de viefteende eeuw is in ’t bos aan de Roer eine woontore geboewd es veurluiper van ’t huidige kesjteelke. In 1710 boewde Johan Harthart von Holthausen, getrouwd mit Maria Theresia de Mouwens, hie ein boeteplaats op ’t good de Horst tot Roerbosch. Dit had hae door ein erfenis gekrege. ’t Waerde in 1771 opgekoch door Mathias Justinus Van der Vekene (1713-1788), ridder, drost van Winger van de H. Georgius en Gempe en lid van de Souvereine Raod van Oosterieks Gelder. Dae ging in april 1774 ein lening aan van 600 pattacons bie advekaot Clout.

t Geldj waas besjtump veur “opbouwinge van ’t casteel van Hatthem”. Hae is als dusdanig dus de eigelikke boeheer van ’t kesjteelke. In 1802 waerde ’t verkoch.  De nuje eigenaer waerde Hendrik Joseph Michiels (later Michiels van Kessenich) dae dao mit zien femilie woonde. In 1954 koch de gemeinte Remunj ’t totaal ongerkomme geboe op. Nao 1945 hadde hie poletieke gevangene (NSB’ers) en repatriante oet Oos-Indië gebivakkeerd. De Gemeinte deej ’t geheel resterere.


In 1966 waas ’t kesjteelke veur de eerste ’t dekor veur ’t internasionaal bekinde Hammerveld Jazz Festival. In 1975 äöpende Eric Klinkert hie ein “Tap- en Roosterplaats”. ’t Kesjteelke waas toen nog wit gepleisterd. In 1988 waerde ’t door de gemeinte verkoch aan de femilie Dielemans. In 1989 volgde ein grote verboewing van ’t kesjteelke en de koetsjhoezer toet resterant en hotel. Later zeen de grote en klein serre aangeboewd. In 2004 kwaam door de momentele oetbaters nog ein nuuj inrichting.

Veer zeen ein hoofgeboe mit bordes en eine trapgevel oet de achteende eeuw. Op de baoveheuk zeen twee zogenaamde arkelteurkes aangebrach in de negeteende eeuw. De koetsjhoezer sjtaon, en det is ein eigenaardigheid, sjuuns op ’t hoofgeboe. Dees sjtamme oet ’t inj van de achteende eeuw. D’r is ouch ein saort omgrachting in de vorm van eine viever.

Dankbaar is gebroek gemaak van o.a.: http://www.janruiten.nl/buurtschap-roer/roer-hattem.htm

Teks en foto’s : Guus Rüsing.