Veur de dertigste keer waerd dit jaor op de derde oktober de “Tag der Deutschen Einheit” gevierd. ’t Is eine verplichte feesdaag in de ganse Bundesrepubliek en de winkels zeen toe.
Worom op de derde oktober? Det is de daag det in 1990 de Deutsche Demokratische Republik (DDR) deil ging oetmake van de Bundesrepublik Deutschland. In sjitterend ambsduits hit det: “Der Tag der deutschen Einheit erinnert an das Wirksamwerden des Beitritts der Deutschen Demokratischen Republik zur Bundesrepublik Deutschland”.
Op dae daag heel de DDR es zelfsjtenjige sjtaot op te bessjtaon, op veer daag nao 41 jaor nao de oprichting in 1949. In Berlien waerde door hongerdoezjende emosioneel miense dees “Wiedervereinigung” gevierd. De toenmalige Bundespresident Richard von Weizäcker belaofde: “In freier Selbstbestimmung wollen wir die Einheit Deutschlands vollenden”.
Wie kwaam ’t so wied? Veer hadde de “Val van de Moer” in Berlien al gehad op 9 november 1989. Op 17 juni 1990 (let op dae sjpesjiale datum!) had de konservatieve DSU (Deutsche Soziale Union) in de Volkskammer in oos-Berlien gezag det de DDR mit de daag van vandaag zich moogde aansjloete bie de Bundesrepubliek. De emosies ware neet van de loch en de minister-president, Lothar de Maizière, prebeerde, mit meuijte, tied te winne.
In de zomer van 1990 leep ’t op eine sjpits. Naodet de wes-duitse Mark waar ingeveurd sjting de oos-Duitse ekenomie op insjtorte. Tegeliekertied vertrokke hongerddoezjende
Delegasies oet de twee Duitslenj ginge aan de sjlaag om ein verdraag op te sjtelle. Tegeliekertied waerde de zogenaamde “twee plus veer” ongerhanjelinge geveurd. De twee Duitslenj en de veer euverwinnaers oet de oorlog: Amerika, Rusland, ’t verenigd Keuninkriek en Frankriek. Die letste veer hadde nog flink väöl in de melk te brokkele.
In ein dramatiese zitting van de oos-Duitse Volkskammer ginge de partieje akkaord mit de toetraejingsdatum van 3 oktober bie de Bundesrepubliek. Det waas ’t eerst meugelikke nao de “twee plus veer” ongerhanjelinge.
Waat waas noe dae zeventeende juni veur eine belangrieke daag? In Wes-Duitsland waerde op dao daag de opsjtand van de arbeiders in de DDR herdach dae bleujig waerde ongerdrök in 1953. Tag der deutschen Einheit: toen nog mit ein klein “d “gesjreve.
Teks: Guus Rüsing.
Foto’s Pixabay
