Beesterdaag is de daag wo-op veer de beester get ekstra aandach gaeve. Miense wille dae daag laote zeen det beester ouch rechte höbbe en besjermp motte waere. Daorom vraoge beesterrechte-aktiviste op deze daag aandach veur dees rechte en de besjerming daovan.
De datum van deze daag, altied 4 oktober, kump van de feesdaag van de Heilige Fransiskus van Asisi. Op ein internasjionaal kongres van vereniginge veur de besjerming van beester in mei 1929 in Wenen waerde deze daag offesjeel oetgerope. De eerste Waereldbeesterdaag waas dus op 4 oktober 1930.
Toet veur ein paar jaor truuk waerde op deze daag, veur de kienjer mit häör hoesdeer, de Alderbeester-optoch georgeniseerd in Remunj. Mit ein zaegening in de kirk. Ein sjoon tradisie.
Fransiskus van Asisi waerde in 1181 of 1182 gebaore in Italië en sjtorf in 1226. Hae is de sjtichter van de orde van de Fransiskane oftewaal Minderbroeders. Volgens de legende praekde hae eine keer veur de beester. Hae heel van de natuur en beester. Ouch zol hae ’t Zonneleed gesjreve höbbe, wo-in hae de ganse sjöpping priest, wo-onger weer de beester. Al in 1228 waerd hae Heilig verklaord, pas twee jaor na ziene dood. Wie hae de paus toesjtumming vroog ein orde te moge sjtichte zoog hae oet wie eine baedelaer. Hae sjteit bekind veur zien eenvoud en zelfgekaoze ermooj..
De paus van allewieles haet, es eerste in de gesjiedenis, ziene naam aangenaome es teiken van dae eenvoud. Paus Fransiskus haet giester, op de veuraovend van de feesdaag van Fransiskus (Vanaovend is ’t d’n aovend, morge is ’t de daag) ein bezeuk gebrach aan ’t graaf van ziene naamgaever in Asisi. Hae teikende dao zien derde ensikliek “Fratelli tutti” = “Veer zeen allemaol breurs en zösters”. Ein ensikliek, oorsjronkelik eine rondjgesjuurde breef van de paus aan alle bisjoppe mit veursjrifte, is noe ein sjrieves wo-in de Paus zich aan de ganse kirk en “alle miense van goje wil” rich euver ein bepaold tema. Dees geit euver de sosjale, politieke en ekonomisie plichte tösse alle miense es kienjer van God. De wäörd “Fratelli tuti” komme rechsjtreeks van de heilige Fransiskus zellef. Simboliser geit ’t waal neet.
De eerste ensikliek van Paus Fransiskus hoot “Lumen Fidei” = ” ’t Leech van ’t geluif”. Dees waas al veurbereid door ziene veurgenger Benediktus XIV en kwaam al in 2013 oet, ’t jaor det hae Paus waerde. In 2015 kwaam de tweede ensekliek mit de titel “Laudate Si” = “Zeet gepreze”. Dit kump rechsjtreeks oet ’t Zonneleed van de heilige Fransiskus wo hae de sjöpping pries en geit euver ’t miljeu. Det is ein dudelikke verwiezing.
’t Pötbeeld van Sint Fransiskus oet 1951, noe in de Voogdiesjtraot, is van de handj van Joep Thissen en de teks “St. Franciscus besjerm oze Pöt” is van Ome Bees. (Drs. Joseph Hansen, dae mit ziene bienaam “de Koe” vandaag ouch naamsdaag vierde).
Eine sjone Alderbeestedaag gewuns. Bön good veur alle beester!
Teks en foto: Guus Rüsing.
