Dinsdig 6 oktober 2020. Mathias Bertrams (4). Krankewal 15B en 15C.

Foto: Guus Rüsing

Hubertus Mathias Bertrams waerd gebaore op 25 jannewarie 1874 in Remunj en sjturf op 13 september 1929, pas 55 jaor aad, ouch in Remunj. Ondanks det hae neet aad is gewaore haet hae heel get in Remunj geboewd. Zeen weeg sjting aan de Kepel en hae waas de zoon van Mathias Bertrams en Petronella Timmermans. Zien elders hadde ’t hotel-restaurant “In het Gouden Kruis” tegeneuver de Kepel in ’t Zandj. Dao kwame toendertied doezjende luuj, die op bedevaart ware, get gebroeke of sjlaope. Naeve ’t hotel had de femilie ouch nog eine winkel en ein eige bekkerie. 
Mathias volg tösse maert 1893 en maert 1894 lesse aan de “Teekenschool”. Hae is pas 19, en zit nog op sjool, es hae veur Burggraaf Charles A.M.E. van Aefferden in 1893 ’t kesjteel Sjeundele teikent en oetveurt!
Op 15 oktober 1901 trouwt hae mit ’t Remunjs maedje Marie Cunegonde Gertrude Gabriels. Ze wone, mit zien elders, aan de Kepelderwaeg 213, ouch door hemzelf ontworpe.

Op 14 desember 1909 waerd de boewvwergunning aangevraog veur ein woonhoes veur François Neujean op de Krankewal 15B. Veer zeen ein hoes mit twee boewlaoge mit eine verheugde entree mit daobaove eine balkoen mit ein gestukde balustrade.en dörpels van Naamse sjtein. Daobaove eine toepgevel mit vinster en aan weerszie eine daakraam. Ouch de plint rondj de vinsters van het soeterain zeen van Naamse sjtein. Van ’t rechse vinster is later ein deuir gemaak veur.de fietse. De randj van flatstones liek neet orzjeneel. De vinsters zeen rechheukig mit segmentbäög en ein aafronjing in ’t baoveleeg. Biezunjer is de sjtiel van de rondjbaogvormige roedes. De ziegevel links is blindj.’t Metselwerk is in Vlaams verbandj en wit gesaus.

Ein paar jaor later, op 15 junie 1923, waerd veur dezelfde François Neujean ein boewvergunning aangevraog veur ein woonhoes daonaeve, op de Krankewal 15C. Ouch dit woonhoes is in tradisionalistiese sjtiel ontworpe door Bertrams mer haet ein gans anger karakter. Ouch hie twee boewlaoge. Eine erker mit eine gemetselde balkoen in ’t linkse deil van de frontgevel. ’t Rechse deil haet eine toepgevel. ’t Metselwerk van de baksjtein is in kruutsverbandj. Rechheukige vinsters mit baoveleech en ein dito deur. Verder ein mansardedaak mit daakkepel. De rechtergevel is blindj, grenzend aan eine opgank.

François Nicolas Joseph Neujean (1852 – 1027) waas getrouwd mit Anna Maria Dymphina Butzung (1859 – 1947). Hae had ein laerlooijerie en laerhanjel aan de Neersjtraot 76, pront achter dees woonhoezer. De sjpesialiteit ware laere driefreme. Oorsjpronkelik kump de femilie oet ’t Waolse Hervé, bie Luuk. Dao leverde ze ministers en burgmeisters. François en Anna likke allebei begrave in ’t femiliegraaf op de Aje Kirkhaof bie häöre zoon Joseph Xavier Antoine Léonard dae in 1906, op 22-jäörige laeftied, sjtorf en sjtedent waas aan ’t Grootsimmenarie.(vak 5, nommers 780 -781).

Foto’d en teks: Guus Rüsing.