Vriedig 16 oktober 2020. Jan Jorna (4) Nuje Boelvaar / Sjoolsjtraot.

Foto: Arend Masius
Jan Ales Jorna waerde op 20 julie 1854 gebaore in Wytgaard / Leeuwarderadeel es zoon van Abe Floris Jorna en Baukje Jans Houben. In desember 1888 kwaam hae, via Besel, nao Remunj wo hae in de leer ging bie Pierre Cuypers. Dao nao begos hae veur eige kop es arsjetek.
Hae woonde eers in de Sjoemaekerssjtraot en dao nao op de Nuje Boelvaar. In 1921 ging hae truuk nao Frieslandj, wo hae op 21 september 1927 sjtorf in Idaarderadeel, ongetrouwd.
Op 24 september 1895 waerd de boevergunning aangevraog veur ’t hookpandj Nuje boelvaar 13 / hoog Sjoolsjtraot. Op dezelfde daag waere de vergunninge veur nog ettelikke panjer aan de Nuje Boelvaar aangevraog. Veer zeen noe ein gans wit gesaus pandj. Oorsjronkelik ware allein de omliesting van de deur, de rame, benj tösse de vinsters en tösse de eerste en tweede boelaog wit gepleisterd.
De sjloetsjtein baove de vinsters höbbe diamantköp. Dees komme truuk in de in siermetselwirk oetgeveurde euverganszone tösse de eerste en tweede boelaog. De konzaole van de gäöt zeen gemetseld. Interessant is de haos gans blinje ziekantj. Gelökkig zeen de diamantköp en de gäötkonzaole aan de witte reus ontkomme.
Teks:Guus Rüsing.
Foto’s: Arend Masius.