Franciscus Hubert Joseph Rouleau waerde op 5 oktober 1852 gebaore in de Munsterssjtaot en hae sjtorf op 7 jannewarie 1914, ouch in Remunj. Zien elders ware Franciscus Josephus Rouleau, tummerman (1826-1910) en Anna Catherina Reulen (1823-1892). Hae lik begrave, mit zien eerste vrouw, zien elders en twee zösters op D’n Aje Kirkhaof, (Vak A, 513-516). In 1871 vertrek hae nao Antwerpe om te sjtudere aan de Akkedemie. In 1876 waas hae getrouwd mit Anna Hubertina Janssens die al in 1884 sjtörf. Hae hertrouwt in 1886 mit Theresia Maria Helena Berger. Tösse 1892 en 1896 wone ze in Antwerpe. In 1885 boewt hae veur zichzelf en zien gezin ein groot hoes mit wirkplaats aan de Neersjtraot 40. Dit waas lange tied kantoor van de PLEM, noe ein nagelsjtudio.
Volgens ’t Kadaster (Artikelnummer 2600) zeen dees zes woonhoezer aan de Aje Boelvaar, nommers 51 toet en mit 61, in ’t deensjaor 1884 gesjtich. Ze vorme same eine grote blok van herehoezer in drie boelaoge en sjtale väöl op ein. De linkse drie höbbe de veurdeur aan de rechse kantj en de drie rechse aan de linkse kant. Dao door zitte de veurdeure van de twee middelste naeve ein. Veer zeen ein breij gesjtuukde plintj en sjtuukwerk rondj de vinsters en deure.
Det van de middelste twee wiek aaf en is get rieker. In de eerste boelaog, boave de deure, balkoens mit sjmeediezere hekskes. De balkoens röste op konzaole van sjtuukwerk. Logieserwies komme de balkoens van de twee middelste penjer aanein. De gesjtuukde gevellieste loupe in de eerste boewlaog bedreeglik door onger de balkoens, In de derde boewlaog loupe ze ouch ech door. ’t Is eeuwig zuunj det de eigenaere neet toet ein kleur van veurdeure kinne komme. Nog erger is ’t grote kleurversjil in ’t sause van de gevels, gein gezich. ’t Waas en is bedoeld es ein geheel.
Teks: Guus Rüsing.
Foto’s: Arend Masius.
