Hubertus Wilhelmus Smeets waerde op 3 desember 1861 geboare in Melick en sjtörf op 7 junie 1940 in Remunj. Op 9 mei 1884 trouwt hae in Neel mit Cornelia Verhaegh (1856 – 1921). Ze gaon wone aan de Kepel en kriege 14 kienjer wovan ein aantal vreug sjtörf. Aanvankelik is hae van prefessie rajemaeker. Tösse 1860 en 1890 is hae sjrienewerker en aannaemer. Hae haet väöl hoezer geboewd aan de Kepel. Hae werkde onger de firmanaam Smeets-Verhaegh. De firma ging onger dae naam ouch nao ziene dood wiejer en boewde bieveurbeeld in 1950 – 51 de nuuj Sint Laurentiuskirk in Neel. ’t Echpaar lik begrave op D’n Aje Kirkhaof, Vak 6, nommers 132-133.
In 1905 duit Smeets ein aanvraog veur ein boevergunning veur veer woonhoezer. ’t Waere eenvoudige hoezer in twee boelaoge, wobiej de raampartie in de tweede boelaog waal gehalveerd liek. Opvallend is det de pannedaker doorloupe mer de göäte sjienbaar neet. De panjer höbbe ein gepleisterde plintj die euver alle veer doorlöp. De rame en deure, mit baoveleech, höbbe segmentbaog vorme. Bie nommer 52 is det helaas “vakkundig” verpruts door rechte rollaoge en ein kompleet anger vinsterpartie aan te bringe. Jaomer det dit, ouch door de aafwiekende kleure, deure en ’t vervange van de vinstervleugels, gein geheel meer is. Zol Smeets toen al geweite höbbe det hae in 1908 ouch op nommer 54, dus naeve dees veer, ging boewe?
Teks: Guus Rüsing.
Foto’s: Arend Masius.
