Op zaoterdig 10 juli 2021 is door veurzitter Henk Giesbers van Veldeke Remunj, de viefde Sjeurkelender mit sjpreuke en gezègkdes oet Herte, Neel, Remunj en Zjwame aangebaoje aan Marlou Jacobs.
Marlou is ein kleindochter van Hetty Jacobs-Wiermans. Marlou kreeg dit eerste exemplaar aangebaoje ómdet häör ónlangs overleje oma aan de oorsjpróng van deze kelender sjtóng. Mer ouch ómdet häör oma in heel get beukskes en verhäölkes, mit al häör kénnis van oos Remunjs dialek, ós get heel kosbaars haet naogelaote.
In deze viefde kelender sjtaon edere maondj aaj wäördjes en ein kinjerversje. De teikening van de “Kapel in’t Zand” oppe kaf is gemaak door de Remunjse kunsteneer Gerard Nizet.
De Sjeurkelender 2022 is te koup biej de Póppedokter op ‘t Munsterplein, biej de Bruna Bookhanjel (vreuger Plantage) in de Neersjtraot, biej Bookhanjel Boom in de Neersjtraot, biej Primera in Neel, biej de Kleine Tovenaar in Neel en biej Bookhanjel van Heijster in Zjwame.
De oplage is beperk. G’r mót d’r zowie eder jaor sjnel biej zin óm neet mis te griepe.
