Oet leefde veur de sjtad.

Zaoterdig, 10 september 2022.

Vandaag en mörge is 't ouch in Remunj "Aope Monementedaag". Dit is al de 36ste edisie en dit jaor is 't tema duurzaamheid. Wis geer det Remunj meer es 200 monemente haet? Sjoon mit dees daag is det d'r monemente van binne te zeen zeen die angers neet aope zeen. Kiek waal oet: neet alles is allebei de daag aope.

't Meis duurzame monement in Remunj is toch dinkelik waal de Munsterskirk es euverbliefsel van 't Munstersklooster. Dit klooster, later gepromoveerd toet abdie, waas dudelik ein femilieprojek van de femilie van de grave van Gelder. Sjra, graaf van Gelder en zien vrouw, Greet van Braobant, waere döks gezeen es de sjtichters en likke d'r ouch begrave. Mer veer kinne de rol van de moder van Sjra neet oetvlakke. Zie waas gebaore es Richardis von Scheyern-Wittelsbach, dochter van Hertog Otto I van Beiere. In 1207 waerde zie witvrouw van graaf Otto I van Gelder. In 1220 en 1221 waerde zie in oorkondes van de paus nog priorin geneump, daonao abdis.

In 't jaor 1220 mot 't klooster al bewoonbaar zeen gewaes. Op 1 oktober kump Engelbert I, aartsbisjop van Kölle, ouch nog femilie, in elk geval de absis van de kirk inwieje.

Damit höbbe veer de duurzaamheid van ein kirk: 822 jaor dezelfde funksie, mit ein klein ongerbraeking in de Franse tied.

Teks: Guus Rüsing.

Foto: Fotostudiocarreno