Mit ut wissele van ut jaor sjloete veer ein jaor aaf. 2019 waas ut jaor woh Remunjenaere zich dök neet serieus genaome veulde. Meistal luuj diej te make höbbe mit bakke vol euverlas en diej ondanks tal van klachte gein sjtap wiejer kómme. Ein gemeintelik apparaat det is ingesjteld op ut aafwimpele van zogenaamde lastige klachte.
In Remunj höbbe ze de móndj vol euver ondermijning maar juus in Remunj gaeve ze wetseuvertraejers eine vriejbreef om alles te doon waat biej wet verbaoje is. Det zuug nog meer sores aan en det is de hoogste vorm van ondermijning. Collegeleeje gooie de prebleme biej eine collega euver de sjötting. Nemes wilt zich de hénj verbranje aan moeilikke dossiers. Zo blieve de burgers mit de sores zitte.
Noew is de vraog ‘kinne veer det ut sjtadsbesjtuur kwaolik naeme?’.
Mien anjwaord is nae, emes dae de capaciteit neet haet kins ze nieks kwaolik naeme. Doe mós det diej kwaolik naeme diej ze der neer höbbe gezat of diej häör op diej plék handjhave. In ut bedriefslaeve zakte dit saort miense geweun door ut ies haer.
Is der dan nieks aan te doon? As ze as Sjtraotvaeger door gans Remunj kumps beloester ich meistal det de luuj ut höbbe gehad mit dit sjtadsbesjtuur. Eine inkeling krieg ein voldoende en moog eerste viool sjpele maar as de rés gein noot kin laeze is dit sextet gedoemd om te fale. Dit vreug om protestleedjes van de burgers en diej zeen der volop te beloestere de létse tied. Maar in de verte gloort haop.
Nog twee jaor dan zeen der verkeezinge en moog de burger dit falend sjtadsbesjtuur nao hoes sjture. Tössetieds moog de gemeinteraod häör oordeil velle euver de veurzitter van dit sjtadsbesjtuur. As det ‘negatief/positief’ oet vilt dan mót der al in 2021 eine nuuje börgemeister kómme en in ein negatief/positief geval is deze börgemeister nog ins 6 jaor eerste börger. Waat mich betröf moge ze diej keuze ouch aan de börgers van Remunj euverlaote. Geweun ein enquête haaie. Dit sjtadsbesjtuur geit toch veur börgerparticipasie. Nou laot de börger dan mitdoon.
Missjien waert ut waal ins tied veur ein ÉCHTE Remunjse börgemeister. Ein dynamische vrouw of man? Ze zeen der nog waal. Geine 70 plusser moog det waere. Geine betweter. Geine notoire zeiverzak. Emes dae taege de sjtruim in kin zjwumme. Emes dae baove de pertieje sjteit. Maar veural emes dae prebleme oplos en neet veur zich oetsjuuf. Geweun emes dae mit de peut in de klei wilt en kin sjtaon. Moog ouch oet de buurgemeinte kómme.
Moog Remunj nog haope? Volges mich waal maar dan mót der waal flink aan zelfreflectie waere gedaon.
Is nooit te laat om det te doon.
Ich wins besjtuurlik Remunj väöl wiesheid en ich wins de Remunjse börgers ein wies sjtadsbesjtuur.
Gooie roetsj,
Uche Sjtraotvaeger Dré.
