Waat is ut sjoon as ze minder gooi memente kins aafwissele mit sjoon memente. As vastelaovesbesjtuurder moog ich jaorliks omgaon mit de veurgéngers van ós vereniging De Veldjmuus. Det doon ich noew al ruum 37 jaor biej De Veldjmuus en bienao net zo lang as veurzitter van de Samewirkende Vastelaovesvereniginge Remunj. De juuste balans tösse de politieke sores en de aope cultuur van de Remunjse vastelaovend. Missjien is ut det waal wohróm ich ut in de politiek zo lang vol haai. Heerlik dae prins, jeugprins en of keuningin die zich in häör gemeinsjap profilere zónger schroom te tone. In mien eige vereniging höb ich al 111 veurgéngers oetgerope. Daonaeve nog ein klein 700 veurgéngers biej de anger SRV vereniginge. Sjtök veur sjtök superveurgéngers. Ederein mit zien eige karaktertrekke en zien aantrekkelijkheid.
Jonges en maedjes mit meistal de Remunjse roots en weinig kapsones. Miene waereld en mien dink. Ouch in de Remunjse gemeinteraod kinde ich ein klein 600 veurgéngers. Hil väöl luuj mit weinig geveul veur de Remunjse samelaeving. Die zoogs ze en zuus ze bienao nörges. Toch besjlisse diej euver de ontwikkelinge van de sjtad. Eigelik móste die eers allemaol ein jaor in ein vastelaovesvereniging mitloupe. Van wiek nao wiek. Luuj ontmoete en kultuur preuve. Vreugde en zórge deile. Wages boewe of aad papier ophaole. Kienjermiddage en senioremiddage organisere. Geldj biej ein sjrape om ut meugelik te make. Sjpanninge en ontsjpanninge ervare. Geweun de taal lere versjtaon en te sjpraeke.
Omgaon mit ós Remunjse burgers is de beste voedingsbaom om Remunj te deene. Miene sjteek ligk weer klaor en ich moog weer.
Aeve de sores euver verhoeskoste burgemeister en heisessie aan de kantj ligke. Aeve vriej oet kalle mit miense diej neet elk waord op de waegsjaol ligke. Aeve genete van alles en nog gét. Ouch eine Sjtraotvaeger hunkert nao dit saort dinger en deilt in de vastelaovend respect mit angere. Waat is de vastelaovend toch sjoon. Vier ut, belaef ut en geneet dao van.
Uche Sjtraotvaeger Dré.
