Op de hook van de Sjteinwaeg en de Sjoemaekerssjtraot lik ’t pandj waat door Frans Dupont ontworpe is veur de juweleer en horloger Jan Eyck. Det is de raeje det in de gevel rechsbaove ein klok is ingeboewd es ein teike van ’t beroep van de opdrachgaever. Jaomergenog is ’t oerwerk en de wiezers eweg. Van dit pandj is de ongerverdeping door verboewinge en moderniseringe ram verknooit maar in de baoveverdepinge is de handj van Dupont nog good te herkinne. ’t dateert van 1906 en de sjtiel hit Jugendstil. Frans Dupont waerde geboare in Remunj op 11 oktober 1880 en sjtorf op 19 fibberwarie 1955, ouch in Remunj. Hae waas toen 74 jaor. Op 26 oktober trouwde hae mit Suzanne Engelen.
Nao de HBS deej hae eine kursus aan de Aovendteikensjool en waerde hae bie de Remunjse arsjetek Speetjensvolontaer. In 1898 waerde hae boekundig teikenaer bie de boe van ’t toendertied zeer modern sjlachhoes. Zien eige kantoor begos Frans in 1906 aan de Vinloseport nummer 7. Dao höbbe zien dochters nog lang gewoond. Ongertösse had hae zee sjtudies aan de Akkedemie veur Sjoon Kunste in Antwerpe en Luuk achter de rök. Hae wirkde veur arsjetekteburo’s in Antwerpe, Leide, Den Haag, Rotterdam Hilversum, Brussel en zelfs Peries.
Zien politieke karriere waas d’r sjöld aan det hae nooits ein kirk haet moge ontwerpe. Dao euver eine angere keer meer. Laote veer noe genete van de geboewe die hae in Remunj haet achtergelaote, det zeen d’rs zat en genog.
Foto en teks: Guus Rüsing.
