Giesteraovend, wie de zon ongerging, is het Islamitiese Sokkerfees begos. Dit is ’t inj van de vastemaondj Ramadan.’t Begin is aafhankelik van ’t versjiene van de sikkel van de nuuj maon en kint daodoor per landj versjille. Vriedigaovend is de offesjele datum van 24 mei oet Mekka bevestigd.
Vandaag is ’t dus de eerste daag van de teende maondj, Shawaal, van ’t jaor 1442. Dan waerd de vaste “gebraoke”, dus ’t inj van de Ramadan. Dit hit dan Eid al-Fitr, ouch gespeld es Íd al-Fitr, in ’t Turks Seker Beyraml. In ’t Remunjs ’t Sokkerfees.
Dit waerd oetbundig gevierd: Nao eine maondj euverdaag neet te aete en drinke, te rouke of te vrieje kinyt me zich det waal veursjtelle.
Normaal geit elke moslim, wo ouch ter waerld, mit vrouw en kienjer, nao ein Moskee om ’t feesgebed oet te sjpraeke. Nao dit gebed vluug me zich om de hals. De kienjer kösse de henj van häör elders. ’t Fees duurt drie daag want de femilie, bure vrunj en erm luuj motte fisite kriege. Deze daag is ouch de gelaeg om aaj ruzies bie te likke. Ouch de doje waere neet vergaete. Det det dit jaor, door Corona, gans angers is zal waal dudelik zeen.
Nao eine ganse maondj vaste is men zelf nuuj en zuver gewaore. De moslim verzörg zich deze daag dan ouch ekstra good. Dök waere sjpesiaal veur deze daag nuuj kleijer gekoch, det deje de kristene vreuger ouch mit de Paose. Men wilt d’r op zie “Paosbes”. opsjtaon.
Eid Mubarak!
Teks: Guus Rüsing.
