Op de sokkel van ’t beeldje van Pierre Massy zit ein kopere plaetje mit de teks: “Pierre Massy, Limburgs grootste voetballer, +1958”. Ein tweede, bronze, plaetje guf de volgende informasie: “Door good old R.F.C. aangebaoje aan zien sjtad Remunj, september 2010”. Veur de get jongere laezer: RFC beteikent Roermondsche Football Club. “t Beeldje is gemaak door Dolf Wong Lun Hing. (Verdeend dae noe neet langsaam ouch eine sjtraotnaam, net wie de arsjetek Frans Dupont?). ’t Waerde in eerste instansie in 1967 onthuld door Harry Dénis, aad-aanveurder van ’t Nederlands elftal, dae nog mit Jaerke gesjpeeld haet. ’t Is gegaote door bronsgeter Hans Brink. ’t Waas ’t eerste beeldje, en lange tied ’t enige, waat ter ere van eine Nederlandjse foetballer waerde opgerich.
Dinsdig 2 julie 2020, Pierre Massy (1900-1958)
Foto: Guus Rüsing
’t Beeldje sjting in eerste instansie rech veur ’t kluphoes van RFC op ’t sjportpark aan de Maashave op de Sjtadswei. Dao is noe ’t Designer Outlet Centre. Nao get verhoezinge sjteit ’t noe in de Neersjtraot bie de bookhanjel Boom. Of mot ik zekke det ’t vlakbie de tebakswinkel, beheert door zien vrouw, sjteit?
Veur de tweede waereldoorlog leverde Limburg vief sjpelers veur ’t Nederlands elftal. Det ware Felix en Soons van MVV Mesjtreech en Vroomen van Juliana, Bliejerhei, eder veur eine wedsjtried. Harrie “de Boer” van Schreurs van RFC waerde twee keer opgesjteld. Oze “Jaer” kwaam maar leefs toet twellef keer.
Volksheld waerde Jaerke Massy, koelpiet op de Emma in Gebrook, op 1 mei 1927, ziene veerde interland. Nederlandj – Belsj in Amsterdam. Meer es 30.000 bezeukers in ’t sjtadion en eine gelaje sfeer mit pliese te paerd die moste ingriepe. In de eerste hellef ginge de Oraanje Lewe aan de leijing mit 2 – 0. Kort nao de rös trokke de Rooj Duvels dit rech nao 2 – 2. Ein gelieksjpel?
Zeve menute veur ’t inj kump d’r eine veurzat, oet eine hooktraej van Jaap Weber (Sjparta), hoog in sjtraofsjöpgebied van keeper Caudron van de Belzje …
De bal liek te hoog …
Dao kump Jaerke aanvlege …
In eine flits aanwezig …
Eine te kleine sjpits …
Hae sjprink baove alles oet …
Eine akrobaat …
Mit de kop …
GOOL: 3 -2.
Eine volksheld is gebaore. In elk geval haet hae waal ziene verdeende sjtraotnaam gekrege. D ‘r is nog väöl meer euver hem te vertelle.
Foto en teks: Guus Rüsing.
