Donderdig, 6 augustus 2029. Hoesname op de Merkt.

Meistal ware 't herberge, broewerieije of winkels die eine eige naam hadde. Det waas dan döks te zeen aan eine gevelsjtein of ein bord aan de gevel. Soms heel plasties: Dink aan de "Gaper" bie dreugisterieje. Wo is dae gebleve? Remunj haet zeker ouch ein groot aantal van die name, det is truuk te vinje in de arsjieve. Waat dink geer van "De Drachenfelz", "De Hulk", "De Veer Heemskienjer", enzovoorts. D'r zeen nog waal get (Horeca) bedrieve die zonne naam mit greutsigheid drage. Waat dink geer van de winkeleer op de hook van de Heilige Geissjtraot / Jezewietesjtraot: " In den Gekroonden Valck ", dae haet de marketingwaerd good begrepe.

Op de foto van eine wandj van de Mert zolle van links nao rechs de volgende name in aanmerking kinne komme: "De Emmerick", "De Boon", "De Paereboum", "De Apoteek", en de "Moriaan" of "Bonne Femme".

Remunj zol sjtols op zien verleje es hanjelssjtad en Hanzesjtad motte zeen. Ederein sjreef det veer de binnesjtad motte promote en profielere.. Kinne veer die hoesname neet teruukbringe? Op ein uniform meneer: Ein houte balk mit dao op de lelie oet 't waope van Remunj aan de gevel (Vriej van prekariorechte! ) mit dao onger ein waopensjild mit de naam of ein anger kleurriek teiken van 't hoes? Zoe kins-se dich es winkelsjtad ouch ongersjeije van de konfeksie koupsjteej.

Teks en foto: Guus Rüsing.