OET LEEFDE VEUR DE SJTAD.

Zaoterdig, 17 september 2022.

Adolf Egbert Adriaan Marie Wong Lun Hing waerde op 7 mei 1921 gebaore in Remunj en sjtorf op 26 april 2017 in Naer. Hae haet os sjitterde kunswerke naogelaote.

Dinkelik kint ederein waal zien Jubileumfontein oet 1948 op 't Munstersplein. Die haet ein döbbelfunksie: ter herdinking van 't vieftigjäörig regeringsjubileum van keunigin Wilhelmina mer ouch opgedrage aan de Remunjse vrouwluuj veur häör pronte gedraag wie väöl mansluuj gedwonge ware om in Pruses te gaon werke.

Höb geer waal ins good nao de benkskes gekeken die daobie heure? Mit die sjitterende zjwane es peutjes?

Eine tied geleje zeen die benkskes zelfs "kwiet" gewaes. Gelökkig is de fontein noe weer in de sjtaot wie Dolf Wong zich det gedach haet. Ich bön greuts det ich hem nog perseundelik gekint höb es eine aimabele manne.

Wanneer waerd de rotonde wo zien beeld "Maedje mit de meeuwe" sjteit eindelik nao hem verneump?

Teks: Guus Rüsing.

Foto's: Fotostudio Carreno.