OET LEEFDE VEUR DE SJTAD (4)

Zaoterdig, 1 oktober 2022 - Op 't van Horneplein in Häör sjteit dit beeld van de Häörse kunstenaer Jaak Waeijen. 't Sjtelt Filips van Montmorency, graaf van Häör veur, dae in 1568 in Brussel waerde geköp.

Waat had Remunj noe in 't verleje mit Häör vandoon? Zo goot es nieks, det waas boetelandj aan de euverkantj van de Maas. Wo de Here van Häör oorsjpronkelik vanaaf kwame is neet bekind. In eders geval bewoonde zie al veur 't jaor 1200 't kesjteel op ein sjtrategische plaats aan de Maas en ware aan dae weskantj tamelik machtig.

Maar wie kump 't dan det 't Hateboer en De Weerd, aan de angere kantj van de Maas, toch Remunjs gebied zeen?

Op 22 mei 1342 kwaam d'r ein euvereinkoms tösse 't sjtadsbesjtuur van Remunj en de Heer van Häör, Wullum van Altena. De luip van de Maas waerde zo ongeveer ongerhalve kilomaeter richting sjtad gebrach. Det waas om 't hanjels- en personeverkeer nao Remunj gemekkelikker te make. De Maas maakde toet 1342 ein lus vanaaf Ool nao 't weste. Dinkelik haet me bie Ool ein doorgraving nao de Roer gemaak, zodet 't letste deil van de Roer noe Maas waerde. Det maakde van Remunj ein Maassjtad.

Daomit kwaam de buurtsjap Hoembergen, later Hatenboer, en de de Weerd aan de "verkeerde" kantj van de Maas te ligge. Me heel de aje grens mit de Maas aan.

Nog lang waas bie Häör de "Aaj Maas" te zeen. Ontgrinjinge en 't Lateraal kenaal höbbe dao in de veurige eeuw ein inj aan gemaak.

Teks en foto: Guus Rüsing.