Oet Leefde veur de Sjtad (9) - Het Bastion

Vanaaf de Krankewal / hook Graaf Reinaldsjtraot löp ein sjuuns paad nao de Dr. Leurssjtraot. Dan geit 't aeve zo sjuuns wiejer in de Dr. Leursziesjtraot. In feite löp 't diagonaal door 't woonblok haer. 't Haet (nog) geine naam.

Dees gats en de aansjloetende Dr. Leursziesjtraot volge 't verluip van ein van de bastions van de vestingsjtad Remunj. Ein bastion is ein veuroetsjpringend deil van de verdedigingswerke, boete de sjtadsmoere oetsjtaekend, in Remunj ware dees gemaak van aerd. Ein bastion is aan drie kenj te verdedige en haet de vorm van eine veuroetsjtaekende, drieheukige, punjt. Vandao de sjuunste van dees gats en de Dr. Leursziesjtraot. Bie mien weite is dit de insigste plek in Remunj wo dit nog herkinbaar is, ouch in de verdeiling van de persele grondj.

De bastions rondj Remunj waerde vernuuijd aangelag in 1705 es antjwaord op de inname van de sjtad door de troepe van de Republiek Hollandj onger leuijing van Menno van Coehoorn in 1702.

In 1784 maakde Keizer Josef II van Oosteriek ein inj aan de sjtatus van vestingsjtad omdet det neet meer pasde in de modern oorlogsveuring van dae tied. In de tied daonao waerde porte, tores en bastions gesjlech en de sjtadsgrachte mit aerd gedemp.

Vraemd is det aan 't begin van de Graaf Reinaldsjtraot gein sjtraotnaamplaetje sjteit. Es dit door de Gemeinte waerd opgehange kinne d'r mesjiens ouch twee naambördjes "Het Bastion - 't Bastion" vanaaf.

Of 't bördje "eigen weg" terech is, is veur mich ein vraog, ich dink det de gats eigendom is van de gemeinte Remunj.

Teks: Guus Rüsing.