Donderdig 23 julie 2020. Arsjetek Speetjes (2), Aje Boelvaar 19

Foto: Guus Rüsing

Johannes Hubertus (ouch Jean of geweun Janne) Speetjes waerde op 4 oktober 1848 gebaore in Remunj en sjtorf op 16 oktober 1912 in Antwerpe. Zeen weeg sjting op de Zjwamaekerssjtraot, wo zien elders ein kefee en eine winkel hadde. Die elders ware Peter Mathijs Speetjens en Odilia Steuns. Oze Jean ging nao de opleiding boekunde aan de Akkedemie in Antwerpe. (Remunj, Antwerpe en arsjetekte;  det kump dökker veur!). Hij haolt dao in 1878 eine Prix d’Excellance. Hae ging wirke bie de gemeintewerf van Rijssel (Lille), Frankriek. In 1880 kwaam hae es zelfsjtenjig arsjetek nao Remunj. Tosse 1890 en 1900 pendelt hae tösse Remunj en Antwerpe. Dao troewt hae in oktober 1897 mit Maria Dymphna van Gennip. Zie kriege same veer kienjer: drie dochters en eine zoon. In Remunj wone ze aan de Munstersjtraot nummer 2. In 1904 vertrekke ze weer nao Antwerpe. 

Op 7 julie 1894 sjteit in de Maas & Roerbode de aanbesjaejing veur de boe van dit herehoes, op waat toen hoot de Zjwartbrooksingel, ge-annonseerd. Det is krangs-om mit de aanvraog veur de boevergunning die pas op 27 julie van det jaor waerd geregistreerd bie de Gemeinte. (NAR {Nuuj Arsjief Remunj} inv. nr. 1275, nummer 6634). De aanvraoger is Emile Burghoff.
Remunjenaere kinne dit es ’t ketoor van notaris Gemmeke. Dae waerde opgevolg door Guus Cloudt, de eerste vrouwelikke notaris in Limburg.
 
Foto’s en teks: Guus Rüsing.