Dr. Peter Josephus Hubertus Cuypers waerde in 1827 op de Hamsjtraot gebaore es negende kiendj van Joannes Hubertus Cuypers (1769 – 1858) en Maria Bex (1781 – 1874). In 1921 sjtörf hae in Remunj. Op angers plaatse is väöl euver hem gesjreve, dus hie allein dees korte tekst euver hem.
In 1857 al kreeg notaris Charles Guillon van ’t sjtadsbesjtuur ’t verzeuk ein plan te make veur ein herinirichting van ’t Munstersplein. Hae waas toen ouch lid van de gemeinteraod, mer det waas toen kinnelik gein probleem. Men dach waal veuroet. ’t Plein waerde namelik ein oape vlakte omdet de broewerie / sjtal van de aaj Munstersabdie aafgebraoke waerde. Dit kompleks loog in de richting van de Munsterssjtraot. Hetzelfde golj veur ’t aad Abdissehoes, ongeveer op de plaats wo noe de kiosk sjteit. Det waas in gebroek es sjtedelik arreshoes en waerde euverbojig door de äöpening van de gevangenis aan de Pollartsjtraot op 23 fibberwarie 1863..Ein jaor nao de sjloop waerde ’t terrein beplantj mit sierbuim die gesjonke ware door baron de Keverberg van Aldenghoor in Hale.
Euver ein meziektent waerde toen nog neet gekald. Det kwaam pas later, in 1885, mit de aanbesjtaejing en de deliberasies in de gemeinteraod euver ’t plan waat waas ingedeend door ’t ateljee van Cuypers / Stoltzenberg.
’t Kiosk, in neo-gotiese sjtiel, is grotendeils gemaak van geetiezer en haet twellef heuk op eine ongerboe van gesementeerde baksjtein. Op al die twellef heuk sjtaon zule van geetiezer die mit ein sjmeediezer hek aan de ongerkantj verbonje zeen.
Aan de baovekantj zeen zie verbonje mit oapegewirk ajour-geetwerk. ’t plefong is eine houte, aafgevlakde, koepel. ’t Iezerwerk kump haos zeker oet de Remunjse Iezerwarefebriek van Giesbers.
Det waar veur Cuypers euverigens de tweede kiosk in Remunj. In 1847, hae sjtudeerde nog in Antwerpe, had hae al zoget ontworpe veur de Keuninklikke Hermenie in de Hermenieshaof, toen in de Veursjtad.
Teks en foto’s: Guus Rüsing.
