Op ein jannewarie 1939 waas de verangering tösse de vermalige gemeinte Melick en Remunj ein feit. Dae grens had gelaege ter hoogte van dees sjtraot en de later zo herneumde Petrus Polliussjtraot.
Waas dit zomer de grens tösse twee gemeindes? Nae, in feite höbbe veer ’t euver de internasjonale grens tösse ’t Graafsjap (later Hertogdom) Gelder en ’t Hertogdom Gulick en zien veurgängers..
’t Begos d’r mit det Godfried van Heinsberg in 1311 landj koch langs de Roer bie Herkebos en dao ’t kesjteel Daelenbroeck boewde. Dees Heerlikheid Dalenbroek maakde ongerdeil oet van de Heerlikheid Heinsberg en ouch Herte en Neel heurde daobie. De mannelikke erflien van de Here van Heinsberg sjtorf in 1441 oet mit Johan IV. Zien insichste dochter Elisabeth trouwde in 1472 mit Hertog Willem II van Gulik-Berg. Herte (mit Maerum en Ool) en Neel (mit Leve en Aseraoj) bleve apaart en ginge wiejer es Heerlikheid Daelenbroek toet ze in 1670 onger Opper-Gelre kwame. In 1795, wie de Franse kwame, waerde alles angers, ’t totaal waerde ’t Departement van de Nedermaas.
In 1816, nao ’t Traktaat van Aoke, waerde ’t Nederlandse gebied
tösse Vlorop en Remunj opgevukld mit ’t dan prusies Melik en Herkebos. Daodoor ging waal Niederkruuchte en Elmp, in ruul, aan Pruses verlaore.
Ein sjoon sjtökske gesjiedenis aan de kruutsing van de waeg nao Kölle en Heinsberg, wo de galgeberg sjtong. Veur es de zjwartbrookport van Remunj saoves al gesjloate waas kos men hie terech om te sjlaope in ein aantal herberge. Of wiejer alles te doon waat God verbaoje haet, daoveur waas de buurt beruch! ’t Alternatief waas om zich get te baeje in ’t kepelke in ’t zandj.
Foto’s: Arend Masius.
Teks: Guus Rüsing.
