Sjtraotvaeger waek 8: Sjoon Kersdaag gewins

Politiek gezeen is ut jaor op lokaal niveau veurbiej. Aeve pas op de plaats make en terökkieke nao ut aafgeloupe jaor. Ein jaor mit hil väöl sjpanninge in ut sjtadhoes. 2019 ouch ein jaor woh in sjteeds meer duudelik waerde det dit sjtadsbesjtuur op alle fronte tekort sjuut. Financieel is ut eine ramp, ónger de ambtenaere is sjprake van angscultuur, de raod waert sjteeds meer opgezadeld mit sjtökker die neet aan ut daagleech moge. Ut vertroewe van de burgers in ut sjtadsbesjtuur nump mit de daag aaf. Dees waek sjreef emes op fb, det ut sjtadsbesjtuur allein maar zichtbaar is op foto’s.

Det is ein gegaeve. De zelfverheerlijking is sjteeds meer mode aan ut waere. Ut nuujts van dit sjtadsbesjtuur is der van aaf. De burger prik door de mooie praatjes haer. Want oeteindelik waere de burgers de dupe van dit beleid. De létse raodsvergadering waas ein om neet te vergaete. De ‘ingevlogen’ greun links wethaaier sjtraolde in de tunnelkwestie ein beheurlikke dosis arrogantie oet. Hae beanjwaorde väöl vraoge neet en kós zich det permitteren omdet hae door de coalitie waert gedekt. Per saldo is de gemeinsjap 350.000 euro kwiet aan de tunnels. Eine kostepós dae neet begroot waas. De coalitie zjweeg, de sjaduwcoalitie ZO (Zwijnenberg en Oele) trokke van laer om in de tweede runj,meamaximaculpa te rope. In eine keer waas alles neet meer zo erg. De échte oppositie waas beheurlik kritisch en lag de wethaaier ut vuur aan de sjene. Maar zo as zo dök lachde dae de kritiek weg en koste de woordveurders nao ein fetsoenlik anjwaord fluite. Deze wethaaier haet nog twee jaor om zich te bewieze maar op dees meneer geit der det neet redde en is ein verhoezing aansjtaonde.