Zaoterdig 23 mei 2020. Emile Seipgens (8), “C’est l’amour, det’s de sjpil wo hie alles om dreijt”

Foto: Guus Rüsing

t Eerste beeldje van Florenske waerde in september 1976 onthuld. ’t Waas van de hanj van Dolf Wong Lun Hing. ’t Waas gesjonke door C & A en kwaam op de Sjteinwaeg veur de winkel te sjtaon. Al flot daonao waerde t meerdere kere verneeld en oeteindelik gesjtaole. Ter gelaeg van de oetveuring van de Sjinderhannes in 2002 waerde op Witte Donderdig dit beeld van Dick van Wijk onthuld in de Heilige Geissjtraot. ’t Is gesjonke door de Gemeinte Remunj.

De bekinde aria “C’est l’amour, det’s de sjpil wo hie alles om dreijt” is neet gesjreve door Emilie Seipgens. Bie de oetveuring van 1950 sjreef Driek Ramaekers dees teks om ’t ’t inj van de eerste akte get aantrekkelikker te make en get langer te laote doere. In dae tied waas hae ouch de regisseur. Thei Reynaerdts had de muziekaal leijing. De meziek waas, wie alle meziek in de Sjinderhannes, eerlik gejat van Louis Ganne, Les Saltimbanques. Maar ouch de teks waas neet orezjeneel. Op dezelfde meziek hadden Harrie Bloemen en Max Guillaume al in 1906 ’t volgende gemaak: “Harmenie, is de sjpil wo hie alles om dreijt. Harmenie, blief os wachwaord in leef en in leid. Hermenie, hilt in vrunjdsjap hie alles bie ein. Hermenie, is en blief bie os nommer ein. Dit zoot in de operette “Sempre Crescendo” door de here gemaak veur ’t 12 1/2 jäörig veurzittersjap van de Keuninklikke Hermene van Jonkheer van Aefferden. Ome Driek haet det ongetwiefeld gewete.

De kasteleinsdochter Florenske en Sjinderhannes zeen verleef. De vader, Zjwartse Peter,  vinjd Sjinderhannes mer get al te min veur zeen dochter. De moder van Sjinderhannes zörg d’r veur det häöre zoon kapitein van de ruivers waerd en dan kint Zjwartse Peter neet meer weigere. Ongertösse haet Sjinderhannes zeen zeel aan de duvel verkoch, ouch mit ’t doel Florenske te kriege.  Es de duvel nao zeve jaor kump om Sjinderhannes te haole waerd hae zaat gevoord en mot ’t kontrak terökgaeve. De gevolge zeen katestrofaal veur hem. In de jongste versies kriege Florenske en Sjinderhannes ein zeunke: Oktaefke.

Euverigens had de echte Sjinderhannes, Johannes Bückler, inderdaad ein vriendin: Juliane (Jülchen) Bläsius. Die beveel in de gevangenis op 1 oktober 1802 van ein zeunke Franz Wilhelm.

C’est l’amour, det’s de sjpil wo hie alles om dreijt,
C’est l’amour, zeen de wäörd die eineder versjteit.
C’est l’amour, blief besjtaon toet de waereld vergeit.
C’est l’amour, die Florenske en Hannes vereint.

Teks en fot0: Guus Rüsing.