Op de vieftigste daag nao Paose, de letste daag van de Paostied, waerd in de Kristelikke kirke herdach det de Heilige Geis nao onger kwaam euver de apostele. In de Ortedokse kirke waerd Pinkstere dit jaor op 7 en 8 junie gevierd omdet dao de Paosdatum angers beraekend waerd. Roew eweg verteen daag later dus.
Waat gebeurde d’r op dae Pinksterdag? De geluivige ware in ein hoes biejein wie op ins ein grote windjvlaog te heure waas en d’r ein saort van vlamme te zeen waas die zich baove de köp van de aanwezige verdeilde. Letterlik: “De vurige tonge”. De geluivige krege de Heilige Geis in zich gevare en begoste boetenshoes in alderlei vraemde tale ’t evangelie te praeke. Hie kwame väöl miense oet de allerlei lenj op aaf. Dao op noom de apostel Petrus ’t waord, hae sjprook lange tied, en toen sjlote zo’n driedoezjend miense zich aan bie de geluivige. Dit is ’t begin van de kirk es gemeinsjap, dus Pinkstere is de verjäördig van de kirk es instituut.
“t Pinksterfees is in oorsjrong ajer es ’t Kristendom. ’t Kump van ’t Joedse Waekefees, de Sjavoeot. Det waas in oorsjrong ein dankfees veur de ougs. Naderhandj kwaam de naodrök te likke op ’t herdinke van ’t verbondj tösse God en ’t volk Israël wie God op de berg Sinajie aan Mozes de sjteine taofels van de wet goof. De Kristene nome deze feesdaag euver om te herdinke det de Heilige Geis in de apostele waas gevare; d’r waerde ein euvereinkoms gezeen. Mit Pinkstere is ’t de Geis van Kristus dae de nuuj wet brink die Joede en heidene es Kristene biejein brink es ein nuuj volk van God.
Parallelle zeen ouch te vinje in de Koran: ’t Fees Lailat ul-Qadr. Dit is de allerheiligste nach van de vastemaondj Ramadan. Gevierd waerd de eerste openbaring van de Koran, es nuuj wet, aan de Profeet Mohammed door de Geis; de Ingel Jibrail, oftewaal Gabriël.
’t Joedse fees Sjavoeot waas op de fieftigste daag van ein bepaolde periode en waerde in ’t aad Grieks Pentekoste geneump: Fieftig. Van dit Pentekoste kump oeteindelik oos waord Pinkstere.
Veural bie os Vlaamse bure waerd ’t waord Sinkse gebroek, net es vreuger soms bie os. Det kump oet ’t Letiens Quinquagesima, de letterlikke vertaling van ’t Griekse Pentekoste, dus ouch geweun vieftig.
Nog get anger waord veur Pinkstere of Sinkse zeen: Bleuijfees, Rozepaose, Sniejfees, Blomepaose of blomeoostere.
Ter ere van dae Geis ein foto van de tweede Remunjse Heilige Geiskirk, noe in gebroek es gezondjheidssentrum.
Laote alle “miense van ’t book”, de Tora, Biebel, Koran, mit Pinkstere dae gooje Geis in zich vare. Laote veer zeuke nao detgenige waat os verbinjt, det is meer es waat os sjeijt.
Foto en teks: Guus Rüsing.
