Burgemeisters sjtinge of sjtaon dök negatief in de belangsjtelling. De aafgeloupe waek waas ut neet de beste waek veur burgemeister Jos Heijmans. Omdet hae kwistig en oneigelik gebroek haet gemaak van pötjes waerde hae door de gemeinteraod aafgeserveerd. Jos Heijmans kin ich al gét jaore en hae is altied eine enfant terrible gewaes. Op ein of anger meneer kós ich toch waardering opbringe veur Jos want hae dörfde ziene nek oet te sjtaeke en det sierde um. Hae mós óm de haverklap opdrave in de neudige landelikke TV pregramma’s om zien besjlissinge te verdedige. Det der de neudige arrogansie oetsjtraolde leverde um neet altied vrunj op. Ut respéc veur zien optraejes vlakte aaf en in de Weertse politiek roke ze blood.
Toen ze dan auch eine sjték vónje om te houwe ware ze in Weert sjnel klaor om ut vertroewe in Jos op te zégke. Hae haet mit zien hanjelinge zelf gein gewin gehaold maar had de sjien taege. ‘Josje mós hange’ liek väöl op ein Remunjs scenario. In Remunj waerde ut gedramatiseerd door de linkse hook en in Weert duit zich ut zelfde veur. Ich herinner mich nog de Remunjse dramakwien die blood rook. Neet lang daonao zoot ze in de pluche. In Weert hadde ze de opvolger veur Jos Heijmans al in gedachte veurdet hae zien sjlotpleidooi kós haaie.
Mit de samesjtelling van de Weertse raod in gedachte en de veurleefde van Bovens veur vrouwluuj moog geer zelf al ins eine gok doon waem de nuuje burgemeister kin waere. Ich höb dae gok al gedaon.
Dan euver nao ózze Remunjse burgemeister Donders. Die maak ut mit det veur ut eers in Remunj in 12 daag 4 raodsvergaderinge mótte waere gehaaie en det kinne der auch nog 5 waere. Normaal zeen ut der hoogoet 10 per jaor. Rianne Donders zit onzeker in häör rol en probeert te redde waat der te redde is. Róndjóm häör haer hunkere ze sjteeds meer nao mach. De zelf beneumde coronakeuningin deilt de mach mit de sjteelhavekeuningin en waere bedeend door drie haofnarre. Ut volk telt sjteeds minder mit want ein gedeilte van häör aafvaardiging bekritiseert de planne waal,maar sjtump der vervolges mit in. Dao waert poen oetgegaeve of det ut apeneutjes zeen. Maar ze gaon ut weer goodmake. De planne zeen in de maak. Wedde det de Remunjse burger dalik grandioos de dupe waert van de miskleune van dit kollege. De raekening waert oeteindelik door de gemeinsjap betaald.
De derde burgemeister die de media haolde waas Femke Halsema. De eerste burger van Mokem leet weer ins zeen det ze neet baove de pertieje sjteit. Eigegereid wiej ze is, waerde alle kritiek weggewuifd. Net wiej biej Jos Heijmans en Rianne Donders höb ich auch veur Femke Halsema waal gét réspect. Zie zal de eerste en létse Groen Linkser zeen die de eerste viool sjpeelt in Mokem. Doot det maar ins nao. Jos Heijmans waas eine leuke voetballer en eine burgemeister mit lef. Doot det maar ins nao. Rianne Donders waas ein gooi sjooljuf en waerde de eerste vrouwelikke burgemeister van Remunj maar is helaas sjooljuf gebleve. Doot det maar ins nao.
Toet vaegs,
Uche Sjtraotvaeger,
Dré.
