Sjtraotvaeger 12 juni : BEELDESJTORM

Foto: Pixabay

Net zo as Corona, mit vandaag op mórge in de ganse waereld binne kwaam ging ut auch mit de demonstraties euver racisme en de dao op volgende beeldesjtorm. De waereld sjteit zo noew en dan op ziene kop en dan is bliekbaar alles geoorloofd om dien geliek te haole. Mien vrunj en vriendinne kumps ze in alle geledinge taege. As ze opgegreuid bis in ut Remunjse Veldj wits ze det dao ederein welkom waas. Mien sjoolvrunj ware Indonesisch, Moluks, Surinaams en Antilliaans. Mien kammeräöi kwaam biej ós aete en krege rood moos, erwtesoep en zoermoos. Ich ging biej häör aete en lékte mich vinger en doem aaf aan de lekkerneije van häör.

Veer voetbalde same en deilde leef en leid. Gein miens dae dao meuite mit had. Later kwame de Italiane as gastarbeider in de kaolemiene. Neet lang daonao de Turkse en Marokkaanse gastarbeiders en noew vieftig jaor later is Nederland ein multicultureel landj. In mien voetbalclub kómme waal 25 nationaliteite veur.

Allemaol verdedige ze de kleure van EENDRACHT MAAKT STERK. Zelfde pékske en zelfde sjpelregels. In mien politieke club is ederein welkom en veer zeen de partie mit de meiste fractieleeje oet ein gastarbeidersgezin of oet ein vluchtelingsgezin. Ederein levert zien biejdrage veur de belange van häör sjtad in ut algemein. Veur mich is ederein eine burger van Remunj, van Nederland en eine waereldburger. Ich verzit mich miene hille laeve taege discriminatie en veuroordeile. As ze in ut Veldj bis opgegreuid wits ze det ze vreuger al mit de nek waerde aangekeke as ze zags detse van ut Veldj kwaams. Ich weet waat det is en waat det veur eine impact haet. Dus verzit ich mich dao taege mit al mien meugelikhede. Ich hoof neet te protestere en zeker neet te plundere om mien meining te laote heure. Ich zeuk auch neet nao zondebök van vreuger.

De beeldesjtorm waas 450 jaor geleeje en de sjlavehanjel is minstes zo aad. Toen hadde der miense sjtróndj aan de sjték en die hadde ze der toen op mótte aansjpraeke. Ich laef noew en ich wil noew de luuj aansjpraeke op häör veranjwaordelikheid. Ich kiek eine Duitser van noew neet anges aan omdet diej in de gesjiedenis inkele kere ós landj binne zeen gevalle, det doon auch neet as ut óm Franse, Spanjaarden, Italiane en Oosteriekers geit.

Det is ‘sjnee fon gestern’ is ein Duits gezegde. Ich kiek noew waat fout geit. In mien belaeving krieg ederein ein zelfde behanjeling en kans. Ongeach waem hae of ziej is. Det veer mótte protestere om racisme te veurkómme is ein sjlechte zaak. Racisme pas biej geine eine tied.

Dao zeen op dit mement prebleme zat om same op te losse en dao höbbe veer de hénj aan vol. Dink der om Corona kiek neet welke persoon hae aansjtik mit zien vernietigende ziekte. De waereld is van ós allemaol en gedraag uch daonao.

Toet vaegs,

Dré.

Uch Sjtraotvaeger.

X

Meld je nu aan voor onze nieuwsbrief
Aanmelden