Jan Ales Jorna waerde op 20 julie 1854 gebaore in Wytgaard / Leeuwarderadeel es zoon van Abe Floris Jorna en Baukje Jans Houben. In desember 1888 kwaam hae, via Besel, nao Remunj wo hae in de leer ging bie Pierre Cuypers. Dao nao begos hae veur eige kop es arsjetek. Hae woonde eers in de Sjoemaekerssjtraot en dao nao op de Nuje Boelvaar. In 1921 ging hae truuk nao Frieslandj, wo hae op 21 september 1927 sjtorf in Idaarderadeel, ongetrouwd.
Op 8 desember 1893 waerd de boevergunning ingedeend veur ’t aafbraeke van twee woonhoezer en ’t daoveur in de plaats boewe van twee herehoezer mit pakhoes veur de Dames Romen aan de Hoog Heksjtraot. Allewieles zolle veer zekke de Lindanussjtraot. Deze naam kreeg zie pas in 1896, toen ware dees panjer al klaor. Lindanus waar de eerste bisjop van ’t Bisdom Remunj. Hae had gewoond in de Heksjtraot, vandao. In 1954 waerde door de bewoners van de sjtraot ein petisie ingedeend om de historiese naam Heksjtraot, dae al in 1371 bekind waas, weer in ere te hersjtelle. ’t Veursjtel van B & W dao euver waerde door de Gemeinteraod aafgeweze.
Veer zeen ein groot pandj waat besjteit oet ein hoog (drie boelage) en twee legere (twee boelaoge) gedeiltes. In de midde van ’t hoog deil zit eine trapgevel mit ein sjmeediezere versiering. In ’t front zeen vertikaal lisene aangebrach. Sjpeklaoge in gaele baksjtein en siermertselwerk baove de vinsters.
Aafwachte wie de geplande nuujboe taege dit markante sjtadskompleks geit aafsjtaeke. Lillikker es de noe aafgebraoke nuujboe van ’t aafgebrandje Sint Joep, ’t later MOV, waas kint ’t neet waere.
Teks: Guus Rüsing.
Foto’s: Stoffel.M
