Zunjig 8 november 2020. Dolf Wong (3). De Pelikaan.

Foto: Guus Rüsing

Op 26 april 2017 sjtorf de Remunjse kunstenaer Adolf (Dolf) Egbert Adriaan Marie Wong Lun Hing mit 95 jaor. Hae waas gebaore op 27 mei 1921.
Zoon van de hoesarts Wong Lun Hing aan de Zjwamaekerssjtraot, van Sjinees-Surinaamse kom-aaf, en ’t Remunjse maedje Franssen, ein dochter van de bekinde arsjetek Casper Franssen.
Hae sjudeerde aan de Rieksakkedemie veur Beeldende Kunste bie prefesser Jan Bronner. De veurnaamste temaas van zien werk zeen de miens, de beestewaereld en de jach.
Op 8 mei 1981 waerde dit plastiese beeld van De Pelikaan bie ’t krankehoes van Sint Lerang onthuld. Op de beteikenis hie van kom ich nog gaer ins truuk.

Op ’t idee om de retonde, wo zien beeld “’t Maedje mit de Meeuwe” sjteit, nao hem te verneume besjlisde ’t Kelezje van B & W onlangs negatief. Volgens de beleidsregels van de gemeinte zol emes daoveur minstens teen jaor dood motte zeen. Waat eine grote kwatsj!

Twee taegeveurbeelde, ein aad en ein jonk: Karel Doorman sjtorf in 1942 en kreeg in 1948 zien plein. Ome Jo Hansen sjtorf op 21 junie 1984 (!) en kreeg bie Raodsbesjloet van 25 oktober 1984 (!) zien sjtraot. Toen waas hae pas veer maondj (!) dood. Waat veur beleid en waat veur beleidsregels? Es ich mich kwaod maak vinj ich nog waal get anger veurbeelde wo zich neet aan die teen jaor is gehaje.

’t Zol ’t Kelezje van B & W net sjtaon det te herrope en noe ein Raodsveursjtel in te dene om die retonde alsnog nao Dolf Wong te beneume en waal per 27 mei 2021, ziene hongerste verjäördig.
Det mot toch tied zat zeen om naambördjes te besjtelle?

Teks en foto’s: Guus Rüsing.

 

4 bijlagen