Zaoterdig, 24 september 2022.
’t Sjtasieplein is noe bekind veur zien horecafunksies. Maar d’r zeen netuurlik meer verhaole te vertelle. Beveurbeeld euver de twee panjer Benner op de hook mit de Hamsjtraot. Die hoot vreuger de “Nielderwaeg”, mer de benaming Hamsjtraot kump al veur in 1408 en 1481. Meugelik is det afgeleid van eine hoesnaam “te Hamme” dae al in 1352 geneump waerd.
Karel Benner (1850-1924) waas de boewheer van dees panjer. Hae waas getrouwd mit Barbera Xhaflaire (1847-1898). Hae reisde de kirmisse aaf mit ein hippodroom en eine “aeroplane” kannepé. Waat det letste presies waar weit ich ouch neet. Daomit zitten veer midde in de Remunjse kirmesadel, mit name es Wolfs, Nizet, Vincken, van Bergen, Kunkels en zo wiejer.
Vreuger ware dees hoezer bekind es de sigarezaak van Coorens en de kapper Coumans. Dae zoot in ’t rechse deil, waat meugelik ’t sjmaalste hoes in Remunj is.
Kinnelik had Karel Benner geveul veur humor wie det d’r dit woonhoes leet boewe. Onger de daakgäöt van ’t rechse gedeilte sjteit namelik te laeze “j’y suis, j’y reste”, waat beteikent “ich bön d’r (Benner), ich blief d’r”.
Tekst gesjreve mit dank aan John Vaessen oet zien book “Dood maar niet vergeten, Graven en grafkelders op d’n Aje Kirkhaof in Roermond”.
Teks: Guus Rüsing.
Foto’s: Fotostudio Carreno.
