Ut college kreeg dees waek ein aantal kienjer op bezeuk en de kienjer móchte aeve raodslid zeen. Oet ervaring weet ich det dit veur kienjer ein geweldige ervaring is. Ouch dees kienjer maakte de daag van häör laeve mit. Toen ein kiendj om iets vroog waas ut anjwaord van ut college det ut kienjerraodslid maar ins ein verzeuk mós indeene.
Det höb ich al gedaon waas ut anjwaord, maar nul komma nul reaksiej.
Zo herkinbaar biej dit college. Zelfs kienjer krege det sjnel in de gate. Börgers wille zo gaer mit dinke mit de gemeinte. Initiatief genóg. Zo ouch in de componistebuurt. Eine groep miense waas dao actief en waerde bruut van ein projék aafgehaold det ze al lang deeje. Mit vandaag op mórge waas ut neet meer neudig.
Zo drök ze participatie de kop in. Maar zo drökke ze in Remunj vriejwilligerswerk ouch de kop in. Doezjende miense sjtelle zich besjikbaar veur de gemeinsjap. Ich bin actief in de voetbalwaereld, vastelaovend, sportgala, politiek en wiekactiviteite. Wirk allein hiej al direct same mit 100 miense same en indirect mit 1000 miense. Sjteeds minder luuj zeen bereid om häöre nek oet te sjtaeke veur de gemeinsjap en det is mit name te danke aan de minimale waardering diej ze kriege. Zeker van de lokale euverheid waert meer verwach. Vriejwilligers kriege weinig complimente van de politiek.
De miense woh ze zich veur inzitte höbbe ouch sjteeds minder respec. Dus raak de veurraod vriejwilliger kader op. Aaiere trekke de kér en jongere kroepe op diej kér. Ós sjtad krieg hiej ouch sjteeds meer mit te make. Let op! Door vergriezing in ut kader kiepe sjteeds meer vereniginge óm. Ut georganiseerd plékske in de samelaeving is der dalik neet meer.
Triest maar ‘ut is wiej ut is’.
De Sjtraotvaeger geit door toet de létse sjnik.
