Ich begós de waek mit de Chinese Nuujjaor. Ich sjlaon dit fees neet gaer euver en bin dan ouch meistal van de pertiej. Dit jaor waas ich same mit de nuuje börgemeister van Leudal, Désirée Schmalschläger aanwezig om de lokale politiek te vertegenwoordige. Dae nuuje burgemeester van Leudal waas drék mien type. Geine hoogvleeger en ut type ‘ doot maar geweun’. Det Désirée is pas in Leudal eerste burger en mót nog gét winne aan ein gemeinte mit ein waslies aan kerkdörpe. Maar gluif mich det geit dao in sjlage. Dinsdaagaovend zoot ich de commissie Burgers en Samelaeving veur. Mooie commissie moog ich waal zégke. Lekker zakelik en neet langdräödig. In twee oer sjting veer dan ouch weer boete.
Waas waal eine bewaoge dinsdaag want ich had twee items ‘Banke mit Dré’. Eers in ut grootste reuzeraad det ooit in Remunj haet gesjtange same mit miene kammeraod Minus Hinzen. Waat eine heerlikke miens en ouch zo geweun veur de voes weg. Nao Minus zoot ich op de bank mit Inge en Riet. Die twee dames sjpanne zich in veur ein kaersekapel biej Camilus. Minus waas al te zeen op TV en Inge en Riet zeen de volgende waek aan de beurt. Woonsdaag mós ich opdrave biej miene hértspesialis en dae had allein maar gooi berichte. Veur waat ze waerd zeen. Ut jaor van de rat of wiej de Chinese zégke, van de moes, is good begós. Det Ich óngertösse ouch nog gét burgers höb geholpe mit prebleme op te lossen en of aan te kaarte moge duudelik zeen.
Óngertösse löp ut létse jaor van burgemeister Donders en zal ze waal gaer veur ein verlénging in aanmerking wille kómme. Gouverneur Theo Bovens zal de bevindinge van de Remunjse politiek waal op de mat höbbe ligke. Det Donders neet alle 31 raodsleeje as referentie kin doorgaeve moge duudelik zeen. Ouch biej de Remunjse bevolking ligk ze neet euveral aeve good. Ein petitie die Donders opreup der mit te sjtoppe leut nieks aan duudelikheid euver.
Ut verwachte charmeoffensief van Donders is oetgebleve.
Ingeland maak zich los, Trump kump mit de sjrik vriej, de sjportraod is mit veurbedachte rade veurnaemes ut toewijzigingsbeleid te verangere en dao zeen gein móndjképkes te kriege die mich de móndj sjnoere.
Allein eine eerlikke Remunjse politiek leut mich euverwaege milder te zeen.
Toet vaegs,
Dré,
Uche Sjtraotvaeger.
