Op ’t Zjwarbrookplein sjeit ’t Limburgse verzetsmonement. Dit is eine bronze beeldegroep geplaats op ein hoog vootsjtök van blokke gaele netuursjtein. Baove de tekst op de achterkantj “Veur de herdinking van ’t verzet in Limburg 1940 -1945” is ein groot bronze kruuts te zeen mit dao onger aan weerskenj eine sjtaonde preester dae eine jonge miens biej de sjouwers griep. (Kiek de foto).
In 1947 goof ein orgeniserend kommitee aan drie beeldhajers, Van Hoorn, Maris en Vos de opdrach ein ontwerp te make. In maart 1948 waerde, mit algemein sjtumme, ’t ontwerp van de bekinde kunstenaer Charles Hubert Marie Vos (Mesjtreech, 8 september 1888 – 19 fibbrewarie 1954) gekaoze. Deze had nog in de Cuypers wirkplaatse gewerk. Toen mos permissie gevraog waere aan de provinsiaal kemissie veur oorlogsmonemente, gevolg door ein akkaord van de riekskemissie veur oorlogsmonemente en es letste de minister.
De twee-en-eine halve maeter hoog figure aan de veurkantj waerde gegaote bie de firma Binder in Haarlem. Wie de beeldegroep op verveur nao Remunj ging bleek dae te breid te zeen en mos ’t transport onger begeleijing van de pelise plaatsvinje. Men belde indertied van plaats toet plaats det men d’r aan kwaam. ’t Vootsjtök van 50 ton. veer maeter hoog en twee-en-eine halve maeter breid, waerde bie de firma Victor Laudy in Sittard gemaak. Dit nao ein ontwerp[ van Ir. Alphons Boosten.
Op 5 mei 1951 waerde ’t beeld onthuld door Prins Bernhard. Dit ongersjtreepde det dit monement meer waas es ein gemeintelik monement maer ein symbool waas veur de samewirking van geistelikke en leke in ’t verzet in gans Limburg. Det Limburgse belang bliek nog oet ’t feit det de Goevernäör elke vief jaor eine krans kump likke namens de Previnsie.
In de jaore tachetig van de veurige eeuw waerde ’t monement ongeveer vieftig maeter verplaats in de richting van ’t geboe van de Rechbank Limburg omdet de aaj retonde wo ’t op sjting door ein verkeerstechniese rekonstruksie verdween.
De bronze krens aan ziekantj waerde vlak veur de dojeherding van 2011 gestaole, dees zeen vervange.
Prominent zeen aan de veurkanjt de figure van de sikkertaris van ’t bisdom Leo Moonen, leider van ’t geistelikke verzet, en de Venlose Jan Hendrikx, leider van ’t leke verzet, te zeen. Hie achter sjteit eine groep vervolgde die oet nood bie ein zeen gedreve en zich taegenein ongersjteune in de elenj. Onger häör veut zeen sjlange echtige wezens te zeen, ’t kwaod, waat waerd vertrampeld door ’t goje: ’t humanitair verzet.
Foto en teks: Guus Rüsing.
