In de Remunjse politiek waert ut monopoliesjpel door sjléchs 4 persone gesjpeeld. De sjpelleider oftewaal coalitieleider zit dao mit sjléchs 66 sjtumme de lakes oet de deile en waert gesjteund door 3 anger sjpelers die same amper 1151 sjtumme verzameld höbbe. Zie make de deens oet en degradere anger politici toet tweederangs volksvertegewoordigers.
Häör sjtadsbesjtuur sjtuurde in ein waek maar leefs twee mails die ruum euver de teen miljoen ginge. De eerste mail euver ein verwach megatekort van 6.5 miljoen en dan nog eine mail woh kont waert gedaon euver ein CORONAFONDS van 5 miljoen. Of det ut apeneutjes zeen. Laot noew dezelfde club de aafgeloupe jaore al ruum 7 miljoen van de reserves höbbe vertaert dan wit geer waem de raekening haet betaald en waem de nuuj raekening nog geit betale. De monopoliesjpelers die same minder sjtumme haolde as de sjtraotvaeger besjlisse euver haves te sjloete, ós economie, ós veiligheid, ós sjportvereniginge, culturele sjpeeltjes wiej de passion te financiere en nog väöl meer linkse ideeje.
Euver sjport gesjpraoke. Euveral Kinne miense weer bepaalde sjporte oetoefene ónger veurwaarde. Terwiel in anger sjtaej de voetballers de kicks weer aan höbbe gedaon is Remunj veur de tweede keer ut létse klaor dao veur. Donderdaag 7 mei zou der in ein digitale raodsvergadering ein en anger besjpraoke waere. Maar geer kin ut al raoje de vergadering waerde drék nao de äöpening gesjors en nao ein half oer oetgesjteld. Noew is dit puur te weijte aan ein technisch prebleem maar ut kwaam inkele luuj toch erg good oet.
De oproop van Dirk Franssen van de LVR óm fysiek verder te gaon móch wettelik neet want ut mót openbaar zeen. Volgende waek donderdaag is der ein nuuj poging om de belangriekste agendapunte te besjpraeke. De monopoliesjpelers höbbe zich al biej ein gezat want zie dulde gein advieze van derde en auch gein miense diej euver de sjouwer mitkieke. Höbbe diej dan gein ambities? Zeker wete, die höbbe zie waal. De grootste ambitie is geldj oetgaeve aan nutteloze dinger. En gluif mich de financiele taegevallers van de aafgeloupe jaore veur Corona waere dalik gemakshalve ónger de coronamat gevaeg. Waem det allemaol mót gaon betale det zeet geer en ich. De oppositie móch van ut CDA en Greun Links gein veursjtelle doon want det was politieke profilering.
Laot noew net de twee wethaaiers van dees pertieje zich profilere mit dezelfde thema’s op sociale media. Maar gelökkig is ut doel ut zelfde en kump ut de haopelik biej diej teréch woh ut thoes heurt.
Rés mich ein prangende vraog aan de laezer van deze rubriek. As geer de monopoliesjpelers op sjtraot taege zou kómme weet geer dan waem ut is. Eine oet ut kwartet zal geer waal kinne en de rés waarsjienlik neet want diej zeen veur de burgeriej onzichbaar maar höbbe in ut Kremlin waal ut grootste waord.
Mich moog geer altied aansjpraeke want ich vaeg neet allein maar ruum onéffehede auch zo väöl meugelik op.
Toet vaegs,
Uche Sjtraotvaeger,
Dré.
