Ut nuuje normaal oftewaal zo as wethaaier Angela Waajen zag in de raodsvergadering ‘ut nuuje wirke is normaal’. Ich zou zégke det dit abnormaal is. ‘Ut nuuje wirke’ is ein verzinsel van ut Remunjse college. Ut nuuje wirke is in eder geval onbetaalbaar, onbegriepbaar, en zeker ondemocratisch.
Sjteeds meer Remunjse burgers kómme der achter det dit college gein sjtappe veuroet maak maar hil väöl sjtappe achteroet. Maar nuuje normaal kin der biej mich neet in. Ut nuuje wirke auch neet. Ut is allemaol abnormaal. De Remunjse burger mót gedöld höbbe en in deze tied is der hil väöl vergeliekbaar wiej biej Corona doe kins ut pas achter dich laote as ut virus der neet meer is.
Zake die op de ein plaats kinne moge op de anger plaats neet. De ein coronaregel is de anger neet. Waat eine willekeur en ich sjnap det luuj zich ergere aan de onduudelikheid van de lokale euverheid.
Waem kin zien vereniging, bedrief of welke anger organisasie dan auch in gooi bane leije as der gein duudelikke richliene zeen. Dao waert mit miljarde gegooid en lokaal mit miljoene en dao is nog sjteeds nieks duudelik waat woh noew precies nao toe geit. Woh is de daadkrach gebleve van de besjtuurders van Remunj die altied pronke mit ut zogenaamde ambitieniveau. Ut ambitieniveau is gezak toet ver ónger ut nulpunt. Bienao geine inkele portefeuillehouder verdeent ein voldoende.
Marianne Smitsmans maak nog waal sjtappe maar de rés trap nog geine deuk in ein pékske bótter. De Remunjse besjtuurders vraoge tied en de Remunjse óngernaemers löp de tied weg. Zelfs de deur op ein kier zitte is der neet biej. Ut water sjteig menigein toet aan de lippe en ze blieve loere nao de passiviteit van ut sjtadsbesjtuur.
Ut meis geldjversjlindende college van nao de oorlog haet weer eine greep oet de kas gedaon. Maar mit allein geldj losse gein prebleme op. Dao mótte ideeje kómme van hoe noew verder. Maar mit de prestaties van de aafgeloupe 8 jaor van ut sjtadsbesjtuur in gedachte guf dit neet väöl haop.
Praot mit óngernaemers die planne höbbe, praot óngerling in de raod en zeuk de oplossinge neet biej zogenaamde wetesjappers. Ut CDA reup op eine aovend 1000 keer ‘Mit elkaar’ terwiel ze det neet bedoele. Ónger Greune Linkse windj hadde ze ut in ut coalitiepregram euver ‘Same’. Maar det waord is aan Greun Links neet besjteed want det zeen supersoliste mit nulkommanul ervaring. Voeg dao biej de mitluipers oet Zjwame en die van D66 en dan is de cirkel róndj. De gelaegeheidscoalisiepartner, dae al sinds 1930 in de raod zit, sjpringk auch aaf en toe op de kér om 100 maeter wiejer weer draaf te sjpringe.
Ut zuut der sjléch oet in en veur Remunj as det beleid neet sjnel verangerd. Aan de randj van de sjtad leut ut Outletcenter zeen wiej ut waal kin.
Missjien ins kieke en lere van succesformules van ut outlet en det prestere ze auch nog in ós eige sjtad. Raodsleeje mótte samewirke en neet allein mit de móndj maar veur de belange van Remunj en häör burgers.
Ich sjnak nao ein wanjeling door ein sjtad woh ze weer langs gezellige terrasse en volle winkels löps. Ederein zal begriepe det ich Remunj bedoel. Mien sjtad woh nog hil väöl mis geit.
Degene diej ut noew moeilik höb wins ich väöl sjterkte.
Toet vaegs,
Uche Sjtraotvaeger,
Dré.
