Dit beeld van de kunstenaer Dolf Wong Lun Hing waerde onthuld op Witte Donderdig 1970. Al op 9 fibberwarie 1971 waerde ’t gesjtaole om ’t brons te verpatse. Ein nuuj beeld waerde in 1973 geplaats op de hook Bergsjtraot / Verkesmert. ’t Is gesjonke door N.V. Confectie Industrie Roermond. Netuurlik sjtelt ’t Sjinderhannes te paerd veur.
“t Is geïnspereerd door ’t leedje “Dao kump t’r”:
Ruivers en ruiverinne:
Dao kump t’r, dao kump t’r, dao kump t’r haer te paerd!
Dao kump t’r, dao kump t’r, griep gauw nao lans en zjwaert,
Ruivers en Sjwarze Peter:
Mer hae haet weer get in zien huit, want zeet ins waat hae triestig duit!
Ruivers en ruiverinne:
Dao kump t’r, dao kump t’r, dao kump haer te paerd.
Dao kump t’r, dao kump t’r, dao kump d’r haer te paerd!
Dao kump t’r, dao kump t’r, griep gauw nao lans en zjwaert,
Ruivers en Sjwarze Peter:
Mer hae haet weer get in zien huit, want zeet ins waat hae triestig duit!
Dao kump t’r, dao kump t’r, dao kump t’r haer te paerd.
Sjinderhannes is geine persoon dae door Seipgens is verzonne, hae haet waal degelik besjtange. Ziene echte naam waas Johannes Bückler en hae waerde gebaore op 25 mei 1783 in ’t dörpke Miehlen bie de plaats Nassau in Duitslandj. Zien vader waas eine sjinder, dus emes dae ’t vel van beester haolde om det wiejer te gebroeke. Dink aan de Remunjse Sjinderskoel. De echte Sjinderhannes waas de aanveurder van ein bende, wo ouch eine Sjwarze Peter in zoot. Die bende roufde en maorde. Hae waerde gegrepe en oetgeleverd aan de Franse. Op 21 november 1803 (Volgens de Franse tiedsraekening op de 29ste Brumaire van ’t jaor XII) sjtorf hae onger de guillotine bie Mainz (waat toen Frans waar).
Zien vriendin Julchen (Florenske?) kreeg daoveur, in 1820, in de gevangenis, nog ein zeunke waat de naam Franz Wilhelm kreeg. Julchen kreeg twee jaor gevangenissjtraof en trouwde nog twee keer.
Foto en teks: Guus Rüsing.
