Is noe eine toeval of neet det´t beeldje van Zjwartse Peter bie ein zaak sjteit die “Het Gerecht” hit, vreuger “Het Tribunaal”? In de gesjiedenis is d’r sjpraok van twee persone mit de naam Zjwartse Peter en allebei dougde ze neet en waerde door ein rechbank gesjtraof.
Vader Sjwartse Peter, oftewaal de aje Sjwartze Peter, Johann Peter Petri waerde op 24 mert 1752 gebaore in ’t plaetske Burgen bie Bernkastel. Hae sjtorf örges nao 1812, waarsjienlik in ein gevangenis. Bekind is det hae mit Sjinderhannes same wirkde, so sjtool hae mit hem in augustus 1798 twee paerd. Daezelfde augustus vermaorde die twee same de Joedse veehanjelaer Simon Seligmann, det ging euver ein ingewikkeld leefdesdrama. Zien karriejaere es sjtraotruiver, inbraeker en deef is indrökwekkend. In 1811 waas d’r eine roufeuverval op ein poskoetsj, dao hat hae nieks mit vandoon, hae laefde al jaore onger de sjoelnaam “Johannes Wild” en verdeende de kos es branjer van houtskaol. In de loup van ’t ongerzeuk, hae waas ouch gearresteerd, kwaam zien verleje aan ’t leech door verhaole van mitgevangene. Hae waerde oetgeleverd aan de Franse in Mainz die dao toen de baas ware. Op de elfde van de elfde 1811 waerde hae toet laeveslank veroordeild.
Intressant is det hae in 1780 trouwde mit Maria Katherina Neumann. Det waas de dochter van de kastelein Johann Neumann. Is det ein sjtökske van de verhaollien mit os Florenske?
Oet dit huwelik waerde minstens de volgende kienjer gebaore: Peter Petri, oftewaal de jonge Sjwartze Peter. Andreas Peter, ter dood veroordeild veur dae roufeuverval op die poskoetsj. Johann Georg en Leonard, allebei veroordeild veur deefsjtal. Verder waas d’r noch de dochter Elisabetha Margaretha, in 1812 in Mannheim veur vanalles toet ein half jaor tuchhoes veroordeild. De moder van de jonge Sjwartze Peter kwaam, mit ein (anger?) dochter terech in ’t tehoes veur baedelaers in Trier.
De jonge Sjwartze Peter waas ouch eine kammeraod in ’t kwaod van Sjinderhannes. Hae waerde in Mainz veroordeild toet 15 jaor gevangenissjtraof aan de kitting. Al mit al dus ein fraai femilie!
De kastelein in oze Sjinderhannes van Seipgens is toch get gemeujlikker. Laot ‘m mer Florenske toezinge es ’t ’t mot oetmake:
Doe geis mit nao hoes toe en leuts mich dae kaerel loupe,
doe geis mit nao hoes toe en kieks hem neet meer aan.
Doe geis mit nao hoes toe en leuts mich dae kaerel loupe,
doe geis mit nao hoes toe en kieks hem neet meer aan.
Of teveure in ’t leedje “Vaderleef” door Sjinderhannes, Florenske en Sjwartze Peter same es d ‘r Sjinderhannes besjeit zaet:
Doe bös mich get al te plat en de boesje faele dich.
Det zèk ich, det zèk ich, jao, de boesje faele dich.
’t Beeldje van de kastelein Sjwartse Peter op de foto is gemaak door Wienand Thönissen en Dick van Wijk en sjteit op de hook van de Heilige Geissjtraot en de Pollartsjtraot. In ’t zich van de aaj rechbank. ’t Is op 20 september 1985 onthuld en waerde gesjonke door de Sjtichting Vitrienes Hertje Sjtad. Dit is ’t letste beeldje in de Sjinderhannes beelderoete in Remunj.
Guus Rüsing
