Franciscus Hubert Joseph Rouleau waerde op 5 oktober 1852 gebaore in de Munsterssjtaot en hae sjtorf op 7 jannewarie 1914, ouch in Remunj. Zien elders ware Franciscus Josephus Rouleau, tummerman (1826-1910) en Anna Catherina Reulen (1823-1892). Hae lik begrave, mit zien eerste vrouw, zien elders en twee zösters op D’n aje Kirkhaof, (Vak A, 513-516). In 1871 vertrek hae nao Antwerpe om te sjtudere aan de Akkedemie. In 1876 waas hae getrouwd mit Anna Hubertina Janssens die al in 1884 sjtörf. Hae hertrouwt in 1886 mit Theresia Maria Helena Berger. Tösse 1892 en 1896 wone ze in Antwerpe. In 1885 boewt hae veur zichzelf en zien gezin ein hoes aan de Neersjtraot 40. Op de eerste foto rechs van de ingank van ’t Roersentrum, Jaorelank verkoupketoor van de P.L.E.M. Van mei 1902 bies september 1909 is hae lid van de gemeinteraod.
Oet 1906 dateert ’t pandj op de hook van de Neersjtraot en ’t Meulesjträötje, geboewd es winkelpandj en woonhoes. In de eerste bouwlaog op de aafgesjuunsde hook ein winkeldeur mit links en rechs eine houte pilaster en ein rechheukig baoveleech mit glaas-in-lood. Ouch baove de twee rechheukige etelazjerame zitte rechheukige baoveleechter mit glaas-in-lood. Dit waerd bekroond mit in riek siermetselwerk, aangebrach in ronj vorme op konzäólkes, es verbinjing tösse de rechheukige winkelpartie en de halfronj vinsters in de res van ’t pandj. Tösse de vinsters zeen veer horizontaal benj van gries pleisterwerk en ouch rondjom die vinsters zit pleisterwerk. De fraai moerankers zeen van sjmeediezer.
Teks en foto’s: Guus Rüsing.
