Hubertus Mathias Bertrams waerde gebaore op 25 jannewarie 1874 in Remunj en sjtorf op 13 september 1929, pas 55 jaor aad, ouch in Remunj. Kiek ’t sjtökske van aafgeloupe zunjig.
Oet 1901 sjtampt de aanvraog boewvergunning veur de Neerstraot 51-53. ’t Geit euver ’t aafbraeke van ein “aad” hoes en ’t boewe van ein winkelhoes veur J.Hoen. Baove de veurdeur zeen veer eine gevelsjtein mit ’t jaortal 1987. Toen waerde ’t winkelpandj op ein gesjlaagde meneer verangert in kantoorpandj. Veer zeen Naamse sjtein in de tweede en derde boewlaog. Veer zeen frontons in rondjbaog van helle sjtein baove de vinsters van de tweede boewlaog. De frontons in de derde boewlaog zeen drieheukig mit ein pinakelke es bekroning. De frontgevel löp oet in eine toepgevel mit in helle sjtein ’t jaortal 1901 en dao baove ein fronton. De toepgevel is mit Naamse sjtein aafgedek en haet twee hookpionne. Ein minpuntj zeen de kunssjtof rame.
Teks en foto’s: Guus Rüsing.
